Maliyyə

Ana səhifə

Maliyyə

Azərbaycanda aqrar sektorun maliyyələşdirilməsinə investisiya fondları da cəlb olunacaq

16 fevral 2011 13:03 (UTC +04:00)

Bu barədə ötən həftə Mərkəzi Bankın sədri Elman Rüstəmovun rəhbərliyi ilə Azərbaycan Banklar Asossiasiyası (ABA), Azərbaycan Sahibkarlar Konfederasiyası (ASK), bank sektoru və biznes icmasının nümayəndələrinin iştirakı ilə keçirilən geniş müşavirədə bildirilib.

ASK-nın prezidenti Məmməd Musayev «APA-Economics»ə açıqlamasında bildirib ki, tədbirdə sahibkarların kreditləşdirilməsi üçün borcalan qrupları üsulunun genişləndirilməsi qərara alınıb. Qeyd edək ki, hazırda bəzi banklar və qeyri-bank kredit təşkilatları regionlarda sahibkarların kreditləşdirilməsi üçün borcalan bu üsuldan istifadə edir. Bununla yanaşı, toplantıda banklara bu praktikanın daha da genişləndirilməsi tövsiyə edilib.

ASK rəhbərinin sözlərinə görə, böhranın təsirinin güclü olduğu iki il əvvəlkindən fərqli olaraq, indi ölkə banklarının likvidliyi yüksəkdir və burada sərbəst vəsaitlərin həcmi böyükdür: «Banklar bu vəsaitləri bazara çıxarmaq üçün belə - borcalan qruplar üsullarına getməyə məcburdur».

Bu işlərin sürətlənməsi üçün Mərkəzi Bank banklara regionlarda filiallarını açmağa kömək edəcək: «Yəni, məsələn, indiyədək regionlarda bank filialının açılması üçün müraciətlərə baxılması müəyyən vaxt aparırdısa, indi bu iş tezliklə həll olunacaq».

Aqrar sahənin kreditləşməsini gücləndirmək üçün digər istiqamət kredit ittifaqlarının xətti ilə sahibkarlara verilən mikrokreditlərin artırılması, eləcə də bu prosesə yardım üçün kredit ittifaqlarının gücləndirilməsi olacaq. Hazırda ölkədə 80-ə yaxın kredit ittifaqının olduğunu bildirən M.Musayevin sözlərinə görə, onların maddi-texniki bazasının gücləndirilməsi, texniki yardım göstərilməsi nəzərdə tutulur: «Əsas məqsəd odur ki, nəinki bütün rayonlar, hətta bütün kəndlər maliyyə resurslarına çıxış əldə etsin».

M.Musayev bildirib ki, AMB bu məsələyə də təşkilati dəstək göstərməyə hazırdır: «Regionlarda kredit ittifaqı yaratmaq istəyən olsa, Mərkəzi Bankın İdarə Heyəti bu məsələlərə daha tez baxacaq». Məlumat üçün bildirilib ki, artıq Mərkəzi Bankın rəhbərliyi bu məsələlərin baxılmasının sürətləndirilməsi üçün özünün müvafiq qurumlarına göstəriş verib. Paralel olaraq yeni kredit ittifaqlarının yaranmasının həvəsləndirilməsi üçün ölkə sahibkarları arasında təbliğat işi aparılacaq. Bu məqsədlə Dünya Bankı, Beynəlxalq Maliyyə Korporasiyası, Avropa Yenidənqurma və İnkişaf Bankı, Almaniya İnkişaf Təşkilatı kimi qurumların köməyindən istifadə olunacaq.

Toplantıda banklara aqrar sahənin maliyyələşdirilməsi üçün kredit faizlərinin aşağı salınması da tövsiyə olunub. Ölkədə maliyyə sabitliyinin yarandığını, illik inflyasiyanın isə birrəqəmli olduğunu bildirən M.Musayevin sözlərinə görə, bu şərait banklara kredit faizlərini aşağı salmaq üçün imkan yaradacaq. Hazırda kredit faizlərinin 18-21% arasında dəyişdiyini bildirən ASK rəhbəri bu rəqəmin 15-18%-ə enməsini real sayır: «Bu da məhsulun maya dəyərinin aşağı düşməsinə və rəqabət qabiliyyətinin artmasına kömək edəcək».

Yaxın vaxtlarda Azərbaycanda aqrar sahənin maliyyələşdirilməsi məqsədilə ölkə iqtisadiyyatı üçün yenilik olan – investisiya fondlarından istifadəyə başlana bilər. Toplantıda ölkədə investisiya fondlarının yaradılması, eləcə də xarici investisiya fondlarının ölkəyə cəlb olunması məsələləri də müzakirə edilib. Qeyd edək ki, Azərbaycanda investisiya fondlarının yaradılması və fəaliyyəti üçün hüquqi baza artıq mövcuddur. Müzakirələrdə bildirilib ki, investisiya fondlarının bu prosesə qoşulması kənd təsərrüfatı müəssisələrini faiz xərclərindən ümumiyyətlə azad edə bilər: «İnvestisiya fondları aqrar sahəyə investisiya qoya və sonra əldə olunan mənfəətdən payını götürə bilər». Toplantıda Mərkəzi Bank və iri banklar belə fondların yaranması imkanlarını da müzakirə ediblər.