Sosial

Ana səhifə

Sosial

Prezident İlham Əliyev: “Səhiyyə sahəsində aparılan islahatlar təkcə Azərbaycanda deyil, dünyada da artıq yüksək qiymətləndirilir”

28 dekabr 2011 01:15 (UTC +04:00)

APA-nın verdiyi xəbərə görə, bu barədə prezident İlham Əliyev Əziz Əliyev adına Azərbaycan Dövlət Həkimləri Təkmilləşdirmə İnstitutunun kollektivi ilə görüşü zaman deyib.
Dövlət başçısı bildirib ki, həm bölgələrdə, həm Bakıda bütün tibb infrastruktur, maddi-texniki baza yeniləşdirilir, möhkəmləndirilir, yeni xəstəxanalar tikilir, yeni avadanlıq gətirilir. “Bu gün Azərbaycanın xəstəxanalarında quraşdırılan avadanlıq dünyanın aparıcı klinikalarında olan avadanlıqdan geri qalmır. Yəni, bu avadanlıqla işləyən insanların peşəkarlığı artmalıdır”.
Prezident qeyd edib ki, həkimlərimiz gərək öz biliklərini artırsınlar, beynəlxalq əlaqələr daha da gücləndirilməlidir. Azərbaycan Dövlət Həkimləri Təkmilləşdirmə İnstitutunda mühazirə oxumaq üçün xaricdən aparıcı tibb mərkəzlərindən qonaqlar dəvət edilməlidir. “Bildiyimə görə, bu proses artıq başlanılıb. Biz elə etməliyik ki, Azərbaycan həkimləri artıq yaradılan müasir şəraitə uyğun fəaliyyət göstərsinlər. Biz yeni avadanlıqla yeni şəraitdə işləməyi, tibb elminin yeniliklərini bilməliyik. Xəstələrə çox gözəl xidmət göstərilməlidir”.
Dövlət başçısının fikrincə, bu institutun Azərbaycanda səhiyyə sahəsində aparılan islahatların dərinləşməsi üçün çox böyük rolu var. İnstitutda öz biliklərini təkmilləşdirən həkimlər qayıdıb öz xəstəxanalarında daha da uğurla və peşəkarlıqla xidmət etməlidirlər.
Səhiyyə sahəsində aparılan islahatlar təkcə Azərbaycanda deyil, dünyada da artıq yüksək qiymətləndirilir. Prezident deyib: “Bu yaxınlarda Dünya Səhiyyə Təşkilatının xətti ilə Bakıda keçirilən böyük tədbirdə bu qiymətlər səslənilib, statistik göstəricilər də onu göstərir. Uşaq, ana ölümü azalır, insanların ömrü uzanır. Əlbəttə, bunu şərtləndirən müxtəlif amillər vardır. İnkişaf etmiş ölkələrdə də tibbi xidmət və tibbi qulluq insanın ömrünü uzadan ən vacib amillərdən biridir. Azərbaycanda da bu göstəricilər yaxşılaşır. Elə etməliyik ki, bu, daha da yaxşı olsun. Ona görə, diaqnozun düzgün qoyulması, müayinədən insanların mütəmadi qaydada keçməsi - bütün bu məsələlər çox vacibdir. İnsanların müalicəsi və sağalması üçün biz əlimizdən gələni etməliyik”.
İlham Əliyev qeyd edib ki, Azərbaycan dövləti bu məsələləri diqqət mərkəzində saxlayır. İldən-ilə səhiyyə məsələlərinə ayrılan xərclərin artdığını vurğulayan prezident deyib: “Halbuki etiraf etməliyəm ki, istədiyimiz səviyyədə deyil, daha da artmalıdır. Hələ ki, bu göstəriciyə görə biz inkişaf etmiş ölkələrdən geri qalmışıq. Ancaq biz tədricən bunu aradan qaldıracağıq. Bizim maliyyə, maddi imkanlarımız artdıqca, əlbəttə, səhiyyə sahəsinə daha da çox investisiyalar qoyulacaq. Ancaq əgər müqayisə aparsaq, görərik ki, son bir neçə il ərzində səhiyyəyə ayrılan vəsait dəfələrlə artıb. Əsas odur ki, bu vəsaitdən səmərəli istifadə olunsun. Həm infrastruktur, maddi-texniki baza möhkəmlənsin, həm xidmət, peşəkarlıq lazımi səviyyədə olsun. O ki qaldı, müasir avadanlığa, bundan sonra da biz Azərbaycana ən müasir cihazları gətirəcəyik”.