Sosial

Ana səhifə

Sosial

Şuşa rayonu üzrə ilk dəfə Malıbəyli kənd 1 saylı tam orta məktəbdə elektron açıq dərs keçirilib - FOTOSESSİYA

Şuşa rayonu üzrə ilk dəfə Malıbəyli kənd 1 saylı tam orta məktəbdə elektron açıq dərs keçirilib - <font color=red>FOTOSESSİYA</font>

28 dekabr 2011 11:25 (UTC +04:00)

APA-nın məlumatına görə, açıq dərsdə Şuşa Rayon Təhsil Şöbəsinin (RTŞ) əməkdaşları Əyyub Şırlanlı, Ceyhun Məmiyev, Rəsmiyyə Məmmədova, Şuşa rayon 4 saylı ümumi orta məktəbin ibtidai sinif müəllimi Kəmalə Musayeva, Malıbəyli kənd 1 saylı tam orta məktəbin direktoru Günəş Hüseynova, məktəbin psixoloqu Səhər Həsənova, ibtidai sinif müəllimləri iştirak ediblər.

I a sinfinin müəllimi Naciyə Əlisahibqızı dərsdə riyaziyyat fənnindən “Toplananların yerdəyişmə xassəsi” mövzusunu tədris edib. Müəllim elektron vəsaitlərdən istifadə edərək slaydlardan toplanmış materiallar əsasında mövzunu şagirdlərin bilavasitə iştirakı ilə interaktiv şəkildə izah edib. Daha sonra müəllim şagirdlərin mövzunu necə qavramasını yoxlamaq məqsədilə onlara konkret misallar verib və nəticələri qiymətləndirib. Açıq dərs zamanı şagirdlərin dəftərlərinə də baxış keçirilib, I a sinif şagirdi Mətin Quliyevə nümunəvi, səliqəli dəftərlərinə və səlis xəttinə görə təşəkkür edilib. Sinifdə digər şagirdlərin də tapşırıqların öhdəsindən gəldikləri qeyd olunub.

Açıq dərsdən sonra məktəbin akt zalında I a sinif şagirdlərinin “Andiçmə” mərasimi keçirilib. Birincilər dərslərini yaxşı oxuyacaqlarına, Vətənə və xalqa layiq övlad olacaqlarına and içiblər.

Sonra RTŞ işçiləri və müəllim heyətinin iştirakı ilə açıq dərsə həsr olunmuş müzakirə keçirilib. Açıq dərsi təşkil edən N. Əlisahibqızı məqsədinə nail olduğunu bildirib. Bir müddət əvvəl “Həyat bilgisi” və “Ana dili” fənlərindən elektron dərs keçirdiyini deyən müəllim bu dərslərin şagirdlər tərəfindən daha maraqla qarşılandığını və mənimsənildiyini, keyfiyyətli olduğunu vurğulayıb.

Məktəbin direktoru Günəş Hüseynovaya çıxışında əvvəlcə “Dağlıq Qarabağın azərbaycanlı icması” İctimai Birliyinin rəhbəri, Şuşa Rayon İcra Hakimiyyətinin başçısı Bayram Səfərova, RTŞ müdiri Təvəkkül Əliyevə elektron qurğunun məktəbə verilməsinə, diqqət və qayğılarına görə təşəkkür edib. G. Hüseynova Şuşa məktəbləri arasında ilk elektron dərsin Malıbəyli kənd 1 saylı tam orta məktəbdə təşkil olunduğunu xüsusi vurğulayıb. O, müəllim və şagirdlərin qarşıya qoyulan vəzifənin öhdəsindən gəldiyini deyib, şagirdlərin elektron lövhə ilə işləmələrini uşaqların müasir təhsil standartlarına uyğun çalışmaq bacarığının göstəricisi adlandırıb: “Möhtərəm prezidentin qayğısı ilə tikilmiş bu məktəbdə müəllimlər və şagirdlər gələcəyə inamla baxır. İnanırıq ki, bu cür məktəblər tez bir zamanda Şuşamızda tikiləcək və bu cür dərslər təşkil edəcəyik”.

Əyyub Şırlanlı, Ceyhun Məmiyev, Rəsmiyyə Məmmədova, Kəmalə Musayeva da açıq dərsdən razı qaldıqlarını bildirib, açıq dərsdə fənlərarası inteqrasiyaya geniş yer verildiyini qeyd ediblər. Onlar müəllimin bacarıqlı, təcrübəli, zəhmətkeş olduğunu vurğulayıb, dərslərin keyfiyyətinin daha da yüksəldilməsi üçün təklif və tövsiyələrini veriblər.

RTŞ əməkdaşları birincilərin “Andiçmə” mərasiminin keçirilməsini xüsusi qeyd edib, bunun müəllim və şagirdlərin vətənpərvərliyinin əyani sübutu olduğunu bildiriblər.