Sosial

Ana səhifə

Sosial

Gələn il Azərbaycanın pensiya sistemində yeniliklər gözlənilir

30 dekabr 2011 12:19 (UTC +04:00)

Bakı. Əli Əhmədov - APA-Economics. 2012-ci ildə Azərbaycanın sığorta-pensiya sistemində gözlənilən ən maraqlı yeniliklərdən biri pensiyaların avtomatlaşdırılmış təyinatı olacaq. «APA-Economics»in məlumatına görə, bu barədə bu gün keçirilən mətbuat konfransında Dövlət Sosial Müdafiə Fondunun sədri Səlim Müslümov bildirib.

Onun sözlərinə görə, pensiyaların avtomatlaşdırılmış təyininə sentyabrda başlamaq nəzərdə tutulur: «Bununla bağlı aparılan tədbirlər imkan verir ki, artıq 2012-ci il sentyabrın 1-ə bu prosesə start verək. Həmin vaxtadək fərdi hesabı olan 1 966 607 nəfər və ondan sonrakı şəxslər barədə məlumatlar bazaya oturulacaq və onlardan heç bir sənəd tələb olunmadan onların pensiyası təyin olunacaq».

Pensiya sektorunda digər yenilik plastik kartların DSMF-nin şöbələri tərəfindən yox, banklar tərəfindən verilməsi olacaq. Gələn il qeyri-dövlət pensiya fondlarının yaradılması barədə qanunvericilik bazası yaradılaraq təsdiq olunmaq üçün təqdim ediləcək.

Pensiyaların paylanmasında gözlənilən yeniliklərdən biri pensiyaların səyyar bankomatlar vasitəsilə verilməsi olacaq. S.Müslümovun sözlərinə görə, DSMF rəhbərliyi bankomatların az olduğu ucqar və dağlıq rayonların sakinlərinin pensiyalarını almasının asanlaşdırılması ilə bağlı müvəkkil banklarla müzakirələr aparıb: «Beynəlxalq Bankla müzakirələrdə bizə bildirilib ki, dünyada səyyar bankomatlar tətbiq olunmağa başlayıb, onlar maşınların üzərində quraşdırılmağa başlayıb. Belə bankomatlar dağlıq ərazilərdə istifadə olunacaq. Həmin ərazilərdə yaşayan pensiyaçılara səyyar bankomatların kəndə nə vaxt gələcəyi əvvəlcədən xəbər veriləcək ki, onlar istifadə edə bilsinlər. İlkin olaraq 3 bankomat sifariş olunub, sonrakı mərhələlərdə onların sayı artırılacaq».