Sosial

Ana səhifə

Sosial

DSMF-da kollegiya iclası keçirilib - FOTO

DSMF-da kollegiya iclası keçirilib - <font color=red>FOTO</font>

13 fevral 2012 12:52 (UTC +04:00)

Bakı. Vahab Rzayev - APA-Economics. Azərbaycanın Dövlət Sosial Müdafiə Fondunda (DSMF) ötən ilin yekunları və qarşıda duran vəzifələrə həsr olunan geniş kollegiya iclası keçirilib.

DSMF-dan “APA-Economics”ə verilən məlumata görə, iclasda çıxış edən DSMF sədri Səlim Müslümov vurğulayıb ki, 2011-ci ildə 900 minə yaxın pensiyaçının təqaüdü təxminən 40% artırılıb. Azərbaycanda pensiyanın orta səviyyəsi hazırda təqribən 180-190 dollar səviyyəsindədir, orta əmək haqqı 460 dollara yaxındır.

S.Müslümov bildirib ki, 2011-ci ildə Fondun gəlirləri 2 119,1 mln. manat olub ki, bu da 2010-cu ilə nisbətən 20,1% çoxdur. Ötən il məcburi dövlət sosial sığorta haqları üzrə daxilolmalar 2010-cu ilə nisbətən 10,8% artaraq 1 228,7 mln. manat təşkil edib, məcburi dövlət sosial sığorta haqları üzrə daxilolmaların 58,6%-i qeyri-büdcə sektoru üzrə məcburi dövlət sosial sığorta haqlarının payına düşür. Həmin təşkilatların ödədikləri məcburi dövlət sosial sığorta haqlarının məbləği əvvəlki ilə nisbətən 12,5% artıb, proqnoz 102% icra olunub. Ötən il Fondun xərcləri 2 118,0 mln. manat olub.

S.Müslümov qeyd edib ki, ölkə üzrə əmək pensiyaçılarının sayı, ilkin məlumatlara görə, ilin sonuna 1278,3 min nəfər təşkil edib. Ötən ilin əvvəli ilə müqayisədə ölkə üzrə əmək pensiyalarının orta aylıq məbləği 28,7% artaraq 145,2 manata, o cümlədən yaşa görə əmək pensiyalarının orta aylıq məbləği 36,4% artaraq 160,4 manata çatıb. Ölkə üzrə əmək pensiyalarının orta aylıq məbləğinin əmək haqlarının orta aylıq məbləğinə nisbəti 40%, yaşa görə əmək pensiyaları üzrə isə 45% artıb.

DSMF sədri deyib ki, 2012-ci ilin yanvarın 1-nə pensiya ödənişi aparılan kənd yerlərində yaşayan pensiyaçıların 99%-nin, şəhərlərdə yaşayan pensiyaçıların 100%-nin, ümumilikdə isə 99,4%-nin pensiyasının plastik kartlarla ödənilməsi təmin olunub. Bu məqsədlə ümumilikdə 512, o cümlədən kənd və qəsəbələrdə 123 bankomatın istifadəsi təmin edilib.