Sosial

Ana səhifə

Sosial

Azərbaycanda qar ehtiyatını ölçmək və daşqınları proqnozlaşdırmaq məqsədilə martın 1-dən ekspedisiyalar təşkil olunacaq

16 fevral 2012 11:25 (UTC +04:00)

Bakı. Kəmalə Quliyeva – APA. Azərbaycanda bu il düşən qar ehtiyatını ölçmək və daşqınları proqnozlaşdırmaq üçün martın 1-dən 5 istiqamətdə ekspedisiyalar təşkil olunacaq. Bu barədə APA-ya Ekologiya və Təbii Sərvətlər Nazirliyinin (ETSN) Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyev bildirib.

Onun sözlərinə görə, Quba-Qusar bölgəsinin dağlıq ərazilərində, Balakən-Zaqatala, Qax-Şəki-Oğuz-Qəbələ ərazilərində, Daşkəsən-Gədəbəy zonasında və Naxçıvan Muxtar Respublikasının dağlıq ərazilərində qarölçmə işləri aparılacaq. Qarölçmə işləri ümumilikdə 28 marşrutu əhatə edəcək. Bununla yanaşı, Gürcüstandan da məlumatlar əldə ediləcək. Gürcüstan Hidrometeoroloji Departamenti Kür və Qanıx çaylarının hövzəsində qar ölçmə işləri aparacaq. Bütün bu məlumatlar əldə edildikdən sonra martın sonunda bu il gözlənilən daşqın təhlükəsi ilə bağlı proqnoz tərtib olunacaq.

A. Verdiyev bildirib ki, hazırda Kürün aşağı hissəsində suyun səviyyəsi ötən illə müqayisədə yuxarıdır: “Hazırda Kürün Zərdab məntəqəsində səviyyəsi ötən ilin müvafiq dövrü ilə müqayisədə 65 sm, Sabirabad rayonunda 90 sm, Şirvanda 89 sm, Salyanda 110 sm, Neftçalada isə 22 sm yuxarıdır. Lakin Kürdə səviyyənin 2010-cu ildə daşqınlarda müşahidə olunan səviyyədən xeyli aşağı olduğunu vurğulamaq lazımdır. Belə ki, Zərdabda Kürün səviyyəsi həmin səviyyədən 2 m 87 sm, Sabirabadda 3 m 28 sm, Şirvanda 3 m 35 sm, Salyanda 3 m 65 sm, Bankə və Neftçalada 1 m 74 sm, Araz çayında isə 3 m 60 sm aşağıdır”.

A. Verdiyev deyib ki, hazırda Kür çayının aşağı hissələrində müşahidə olunan artımdan sonra son 3 gün ərzində azalma müşahidə olunur. Belə ki, Kür çayının Sabirabad ərazisində suyun səviyyəsində 3 gün əvvələ nisbətən 13 sm, Şirvanda 6 sm, Salyan və Neftçalada isə 5 sm azalma müşahidə olunub: “Yaxın günlərdə Kürdə suyun səviyyəsində elə də ciddi artım müşahidə olunmayacaq. Alçaq dağlıq ərazilərdə qarın ərimə prosesi gedəcək. Dağ çaylarında suyun səviyyəsinin artımı müşahidə olunur, amma kəskin artım qeydə alınmır. Əsas artım martın sonu, aprelin əvvəlində, qar əriyən vaxt baş verəcək”.

Kür