Sosial

Ana səhifə

Sosial

Rəna Səfərəliyeva: “Azərbaycanda son dövrlər korrupsiyaya qarşı mübarizə məqsədilə bir çox qanunvericilik aktı qəbul olunub, bəziləri üzərində isə iş gedir”

17 fevral 2012 13:05 (UTC +04:00)

Bakı - APA. “Korrupsiyaya qarşı mübarizə sistemli və ardıcıl aparılmalıdır. Buraya qanunvericilik aktlarının təkmilləşdirilməsi, qanunların icrasına nəzarətin gücləndirilməsi, dövlət məmurlarının maarifləndirilməsi, onların maaşlarının yüksəldilməsi, cəza mexanizmlərinin tətbiqi və digər bir sıra struktur islahatların aparılması daxildir”. APA-nın xəbərinə görə, bunu “Transprency International” təşkilatının Azərbaycan milli bölməsi olan “Şəffaflıq Azərbaycan” təşkilatının icraçı direktoru Rəna Səfərəliyeva deyib.
R. Səfərəliyeva Azərbaycanda son dövrlər korrupsiyaya qarşı mübarizə məqsədilə bir çox qanunvericilik aktları qəbul olunduğunu, bəzilərinin üzərində isə iş aparıldığını deyib: “Buna misal kimi, son olaraq parlamentə təqdim olunan “Hüquqi şəxslərin cinayət məsuliyyətinə cəlb edilməsi haqqında" qanun layihəsini göstərmək olar. Bununla yanaşı, qeyd edim ki, Maraqların toqquşması ilə bağlı qanun layihəsi Milli Məclisə göndərilsə də, hələ də qəbul edilməyib. Eyni zamanda vəzifəli şəxslər tərəfindən “Maliyyə xarakterli məlumatların təqdim edilməsi qaydalarının təsdiq edilməsi haqqında” qanunun icra edilməsi üçün lazımı hüquqi normativ aktlar qəbul edilməlidir”.
İcraçı direktor deyib ki, Dövlət Gömrük Komitəsi, Nəqliyyat Nazirliyi, Daxili İşlər Nazirliyi və Baş Prokurorluğun fəaliyyəti ilə bağlı qəbul edilmiş son qərarları yüksək qiymətləndirir.
Onun sözlərinə görə, Azərbaycanda rabitə və informasiya texnologiyalarının inkişafı üzrə 2010-2012-ci illər üçün Dövlət Proqramı (Elektron Azərbaycan) və bunun ardınca dövlət orqanlarının elektron xidmətlər göstərməsinin təşkili sahəsində bəzi tədbirlər haqqında prezidentin fərmanı və Nazirlər Kabinetinin elektron xidmətlərin göstərilməsi ilə bağlı qərarının icrası kifayət qədər sürətlənib. Artıq bəzi dövlət qurumlarında bu iş yüksək səviyyədə qurulub: “Bununla yanaşı, bir çox dövlət qurumlarında bu istiqamətdə işlər axsayır, irəliləyişlər daha az nəzərə çarpır. Daha yüksək uğurlar əldə etmək üçün vahid metodologiyanın hazırlanmasına ehtiyac var”.
R. Səfərəliyeva onu da deyib ki, birbaşa olaraq sahibkarlarla işləyən dövlət qurumlarında da (məsələn, Vergilər Nazirliyi) biznes fəaliyyətinin həyata keçirilməsi tənzimləyici qaydaların sadələşdirilməsi və bəzi sənədlərin ixtisar edilməsi ilə əlaqəli irəliləyişlər qeydə alınıb. Dövlət qulluğuna qəbul (Dövlət Qulluğu Məsələləri üzrə Komissiya), yol polisinin fəaliyyəti (Daxili İşlər Nazirliyi) ilə bağlı da eyni irəliləyişləri qeyd etmək olar: “Bir sıra dövlət qurumları korrupsiya ilə mübarizəyə institusional şəkildə yanaşaraq şəbəkə formasında qeyri-hökumət təşkilatları ilə əməkdaşlıq edirlər. Bunlara misal kimi Əmək və Əhalinin Sosial Müdafiəsi Nazirliyini və Korrupsiyaya Qarşı Mübarizə üzrə Komissiyanı göstərmək olar. Vətəndaşlarla birbaşa təmasda olan digər dövlət qurumlarının da bu istiqamətdə addımlar atması effektiv nəticələr verə bilər”.
İcraçı direktor bu gün ölkədə ən aktual olan məsələlərdən birinin qaynar xətlərin fəaliyyəti ilə bağlı olduğunu açıqlayıb: “Əksər dövlət qurumlarında məlumat qaynar xətləri yaradılsa da, vahid metodologiyanın olmaması əlavə problem yaradır və qaynar xətlərin fəaliyyətinin effektiv qurulmasına mane olur. Təklif edirik bu kimi halların aradan qaldırılması üçün qaynar xətlər vahid metodologiyaya uyğun olaraq yaradılsın və ya artıq yaradılmış qaynar xətlər təkmilləşdirilsin. Qaynar xətlərin idarə edilməsinə, cavablandırmaya peşəkarlar cəlb edilsin və qaynar xətlərin fəaliyyətinin monitorinqi aparılsın, nəticələri barədə ictimaiyyətə mütəmadi olaraq ətraflı məlumat verilsin. Bu istiqamətdə Təhsil Nazirliyi və Baş Prokurorluğunun qaynar xətlərini nümunə kimi göstərmək olar”.
O, həmçinin qeyd edib ki, büdcə vəsaitlərinin xərclənməsi istiqamətində effektiv fəaliyyətin qurulmasına ciddi ehtiyac duyulur.
Azərbaycan Vergilər Nazirliyi və Beynəlxalq Antikorrupsiya Akademiyası arasında korrupsiya ilə mübarizə sahəsində əməkdaşlığın inkişafı və onun qarşısının alınması üçün birgə təşviq üzrə qarşılıqlı anlaşma memorandumu imzalanması barədə danışan R. Səfərəliyeva vətəndaş cəmiyyətinin üzvü kimi bu tədbirdə iştirak etdiyini, bu fəaliyyəti yüksək qiymətləndirdiyini vurğulayıb: “BMT-nin Narkotiklərlə və Cinayətkarlıqla Mübarizə Ofisinin, Avstriya hökumətinin, Dələduzluqla mübarizə üzrə Avropa Ofisinin təşəbbüsü ilə yaradılan Beynəlxalq Antikorrupsiya Akademiyasının ölkəmizlə əməkdaşlığının artırılması müsbət haldır. Şamaxı şəhərində “Azərbaycan Respublikasında korrupsiyaya qarşı mübarizə: nailiyyətlər və perspektivlər” mövzusunda keçirilən konfrans da, bu istiqamətdə çalışan şəxslərin, qurumların, təşkilatların bir araya gəlib, fikir mübadiləsi aparması üçün gözəl imkan idi. Heç də hər zaman bu cür fürsət olmur və hesab edirəm ki, aparılan müzakirələr korrupsiya probleminin aradan qaldırılması istiqamətində faydalı nəticələr verəcək”.
R. Səfərəliyeva vətəndaşları korrupsiyaya qarşı mübarizəyə həvəsləndirmək üçün onlarda dövlətə inam hissi yaratmağın da vacib olduğunu bildirib: “Onlar eyni zamanda öz hüquq və vəzifələrini də bilməlidirlər. Hesab edirəm ki, pulsuz hüquqi klinikaların yaradılmasına da ciddi ehtiyac duyulur”.