Sosial

Ana səhifə

Sosial

Ötən il Azərbaycanda baş verən cinayətlərin 81%-dən çoxu heç bir yerdə oxumayan və işləməyənlər törədilib

18 fevral 2012 16:21 (UTC +04:00)

Bakı. Hafiz Heydərov - APA. 2011-ci ildə Azərbaycanda törədilən cinayətlərin 465-i 18 yaşadək olan uşaqlar tərəfindən törədilib. Bu barədə APA-ya Dövlət Statistika Komitəsindən məlumat verilib.

Məlumatda bildirilir ki, ötən il ölkədə 24,3 min və ya əhalinin hər 100 min nəfərinə hesabı ilə 268 cinayət hadisəsi qeydə alınıb. Cinayətlərin 90,1%-i az ağır və böyük ictimai təhlükə törətməyən cinayətlərə aiddir. Cinayətlərin 32,7%-i şəxsiyyət əleyhinə, 34,9%-i iqtisadi sahədə, 28,0%-i ictimai təhlükəsizlik və ictimai qaydaların əleyhinə, 4,4%-i isə digər sahələrdə törədilib. Qeydə alınmış cinayətlərin 270-i qəsdən adam öldürmə və adam öldürməyə cəhd, 323-ü qəsdən sağlamlığa ağır zərər vurma, 16-sı adam oğurluğu (evlənmək məqsədilə qadın oğurluğu) olub. 254 cinayət hadisəsi xarici ölkələrin, onların 62-si MDB-yə üzv olan ölkələrin vətəndaşları tərəfindən törədilib.

Ötən il narkotiklər və güclü təsiredici vasitələrin qanunsuz dövriyyəsi ilə bağlı 2771 cinayət hadisəsi qeydə alınıb və onların 33,1%-i satış məqsədilə törədilib.

Əməliyyat istintaq tədbirləri nəticəsində ötən il açılmış cinayətlərin 2147-si əvvəllər cinayət törətmiş, 1878-i qrup şəklində, 709-u sərxoş vəziyyətdə, 465-i 18 yaşadək uşaqlar tərəfindən və ya onların iştirakı ilə, 531-i isə narkomanlar və ya narkotik təsir altında olan şəxslər tərəfindən törədilib.

2011-ci ildə aşkarlanmış hüquqpozucularının 74,1%-i cinayət məsuliyyətinə cəlb olunub. Aşkar olunmuş hüquqpozucuların 81,4%-i əmək qabiliyyətli yaşda olub, heç bir yerdə oxumayan və işləməyənlər, 9,7%-i əvvəllər cinayət törətmiş şəxslər, 4,2%-i sərxoş vəziyyətində olan şəxslər, 11,1%-i qadınlar, 2,6%-i isə 18 yaşadək uşaqlardır.

Ötən il qeydə alınmış 1782 cinayət hadisəsi məişət zorakılığı ilə bağlı olub və onların 10,5-i əvvəllər cinayət törətmiş şəxslər tərəfindən, 10,2%-i sərxoş vəziyyətdə törədilib. Məişət zorakılığı nəticəsində baş vermiş cinayətlərin 74,3%-i döymə, 20,5%-i qəsdən sağlamlığa az ağır və yüngül zərər vurma, 1,7%-i qəsdən adam öldürmə, 3,5%- isə digər cinayətlərdir.