Şou-biznes

Şou-biznes

Aynişan Quliyeva: “Düsseldorf səhnəsində öz səsimi eşitmək istəyirəm” - MÜSAHIBƏ - FOTOSESSIYA

Aynişan Quliyeva: “Düsseldorf səhnəsində öz səsimi eşitmək istəyirəm” - <font color=red>MÜSAHIBƏ - FOTOSESSIYA </font>

22 dekabr 2010 13:01 (UTC +04:00)

- Aynişan, “Eurovision” səhnəsində Azərbaycanı təmsil etmək imkanı qazansan, bu müsabiqədə qalib olmaq gücünü özündə hiss edirsənmi?

- Milli seçimlərin finalına keçmək mənim üçün böyük bir şansdır, eyni zamanda səhnə karyeram üçün böyük uğurdur. Finalda var-gücümlə çıxış edəcəyəm. Avropanı artıq heç nə təəccübləndirə bilməz. Amma çalışacağam ki, çox maraqlı və yaddaqalan bir çıxış edim.

- Bir çoxları sənin “Eurovision-2009” yarışmasında Azərbaycana üçüncülük qazandıran Aysel Teymurzadəyə bənzədiyini bildirirlər. Ayseldən daha yaxşı və fərqli perfomans göstərə biləcəyinə əminsənmi?

- İki il öncə bu müsabiqədə Ayselin çıxışını bəyənmişdim. Ancaq çalışacağam ki, təkrarçılığa yol verilməyim. Olduqca maraqlı bir perfomansla çıxış edəcəyimə inanıram. Bu bacarığı özümdə hiss edirəm.

- Beş yarımfinal həftəsi ərzində bütün ifaçılar arasında ən çox sms-i məhz sən topladın. Səncə, 25 mindən artıq səs sənə ifaçılıq bacarığına, yoxsa əməkdar artist Aybəniz Haşımovanın qızı olduğun görə göndərilib?

- Çox şadam ki, mənə xalqımızdan bu qədər səs gəldi. Bu çətin və məsuliyyətli yolda mənə dəstək olan hər bir insana çox böyük təşəkkür edirəm. Bu danılmaz faktdır ki, öncə məni anama görə tanıdılar və sevdilər. Amma mənim səhnə fəaliyyətim tamaşaçıları qane etməsəydi, heç anam da razı olmazdı ki, mənə səs versinlər. Çox şadam ki, perfomanslarım bəyənildi və dəyərləndirildi. Bütün bunların nəticəsidir ki, mən finala keçdim.

- Səninlə birgə artıq altı finalıçının kimliyi məlumdur. Sən özünə beş finalçıdan kimi daha güclü rəqib hesab edirsən və Düsseldorf səhnəsində özündən başqa kimin səsini eşitmək istərdin?

- Finalçılardan üçü mənim yaxın dostlarımdır, onları çox istəyirəm. Amma əgər hamısı finala vəsiqə qazanıblarsa, deməli hər biri rəqibdir. Düsseldorf səhnəsində öz səsimi eşitmək istəyirəm.

- “Eurovision” müsabiqəsində iştirak etmək qərarını nə zaman verdin?

- Dima Bilan müsabiqədə ikincilik qazananda bu qərarı verdim. Mənim üçün əsas olan “Eurovision”da çıxış edib Azərbaycana növbəti qələbəni gətirməkdir.

- Aynişan, sənin digər finalçılardan üstünlüyün nədədir?

- Üstünlüyümü yalnız peşəkar insanlar deyə bilər, amma bir onu deyə bilərəm ki, çox çalışqanam. Hər çıxışımın böyük uğur qazanmasına çalışıram. Məncə “Eurovision” müsabiqəsində iştirak etmək üçün bütün meyarlara uyğun gəlirəm.

- Əgər 2011-ci il üçün təmsilçilik hüququ qazanmasan, növbəti illərdə də bu istəyini həyata keçirmək üçün mübarizəyə qatılacaqsanmı?

- Mənim məqsədim 2011-ci ildə bu müsabiqədə çıxış etməkdir. Hər halda hər şeyi zaman göstərəcək. İnşallah, hər şey yaxşı olacaq. Mən buna inanıram.

“Eurovision-2011”