Şou-biznes

Ana səhifə

Şou-biznes

Mənsum İbrahimov, Aygün Bayramova və Siyavuş Kərimi 48 saat Moskva hava limanında qalıblar

29 dekabr 2010 09:48 (UTC +04:00)

Bakı. Ülkər Qasımova – APA. Azərbaycan Milli Konservatoriyasının rektoru, xalq artisti Siyavuş Kərimi, Azərbaycan Dövlət Akademik Opera və Balet Teatrının solistləri, xalq artistləri Mənsum İbrahimov və Aygün Bayramova, musiqiçilər Elçin Həşimov, Elnur Əhmədov və Kamran Nağıyev hava şəraiti ilə əlaqədar 48 saat Moskvada, hava limanında qalıblar. Bu barədə APA-ya dekabrın 28-də vətənə qayıdan Mənsum İbrahimov məlumat verib. O, dekabrın 15-dən 25-dək Amerikada səfərdə olduqlarını deyib: “Səfər zamanı Aygün xanımla birlikdə Elçin, Elnur və Kamranın müşayiəti ilə San-Diyeqo, Los-Anceles və San-Fransiskoda konsert verdik. Hər konsertimizin sonunda “Qarabağ” şikəstəsini oxuyurduq və hər üç konsertdə bu ifa zamanı bütün zal ayağa qalxdı”.

Dekabrın 26-da Amerikadan Rusiya paytaxtına yola düşən azərbaycanlı musiqiçilər 48 saat Moskvada, hava limanında qalıblar: “Moskvada hava şəraiti çox pis idi və bütün uçuşlar təxirə salınmışdı. Biz 4 sutka yatmadıq və çox əziyyət çəkdik. Orada qalmaq olduqca əziyyətlidir. 48 saat ayaq üstdə dayanmaq məcburiyyətində qaldıq və Azərbaycanın Rusiyadakı səfiri Polad Bülbüloğlunun köməyi nəticəsində problem həll olundu. Əslində mən Heydər Əliyev Sarayında keçirilən layihəmə görə narahat idim. Tələsməyimin də səbəbi o idi. Bakıya dekabrın 28-də günorta saat 16-da gəldik və oradan birbaşa saraya getdim”.

Qeyd edək ki, musiqiçilərin Amerikaya səfəri Azərbaycanın Los-Anecelesdəki Baş Konsulluğu və “İnternational Azərbaycan” jurnalının təşkilatçılığı ilə baş tutub. Səfər zamanı onlar gələn ilin sentyabrında yenidən Amerikada konsert vermək təklifi alıblar.