Şou-biznes

Ana səhifə

Şou-biznes

Rumıniyalı müğənnilər Bakıda konsert verəcəklər - FOTO

Rumıniyalı müğənnilər Bakıda konsert verəcəklər - <font color=red>FOTO</font>

04 fevral 2011 12:40 (UTC +04:00)

Bakı. Ülkər Qasımova – APA. “Buta Palace”da konsert proqramı ilə çıxış edəcək məşhur Rumıniya müğənniləri Dan Mihai Balan və Anda Adam Nyu-Yorkdan Bakıya gəliblər. APA-nın məlumatına görə, konsertlə bağlı keçirlən mətbuat konfransında hər iki sənətçinin iştirakı gözlənilsə də, onlardan yalnız biri – Anda Adam tədbirə qatılıb.

A. Adam Bakıya gəldiyinə görə şad olduğunu söyləyib. İçərişəhərin adını eşidən və bu məkanı yalnız avtomobildən gördüyünü deyən qonaq, havanın yaxşı olmasından istifadə edərək mətbuat konfransından sonra bu qədim şəhəri gəzəcəyini açıqlayıb. A. Adam Azərbaycan haqqında o qədər də çox məlumatı olmadığını etiraf edib: “Bildiyimə görə, Azərbaycan və türk dilləri bir-birinə çox bənzəyir, yalnız dialektləri fərqlənir. Buranın gözəl ölkə olduğunu eşitmişəm. Avtomobillə keçəndə İçərişəhəri gördüm, çox xoşuma gəldi. Buradan çıxan kimi oranı gəzəcəyəm. Günəşli hava da buna imkan verir. Yaxşı ki, burada havalar isti keçir. Rumıniyada isə hazırda mənfi 15 dərəcə soyuq var”.

Xanım müğənni axşamkı konsertdə maraqlı şou nümayiş etdirəcəyini, tamaşaçıları Azərbaycan dilində salamlayacağını vəd edib. O, ötən il Rumıniyanı “Eurovision” yarışmasında təmsil etmək üçün seçimlərə qatıldığını, lakin çox yaxşı mahnı təqdim etməsinə baxmayaraq, təmsilçi seçilmədiyini, bundan sonra “Eurovision” seçimlərində iştirak etməyəcəyini bildirib.

Dan Balana gəlincə, meneceri onun çox yorğun olduğuna görə mətbuat konfransında iştirak edə bilmədiyini deyib. D. Balan konsertdə çıxış edəcək.