Şou-biznes

Ana səhifə

Şou-biznes

“Eurovision-2011” mahnı müsabiqəsində Azərbaycan təmsilçisinin ifa edəcəyi mahnı üzrə müsabiqəyə 60 mahnı təqdim olunub

05 fevral 2011 09:01 (UTC +04:00)

Bakı. Ülkər Qasımova-APA. Bu ilin mayında Almaniyanın Düsseldorf şəhərində keçiriləcək “Eurovision-2011” mahnı müsabiqəsində Azərbaycan təmsilçisinin ifa edəcəyi mahnı üzrə müsabiqəyə 60 mahnı təqdim olunub. Bu barədə APA-ya İctimai Televiziya və Radio Yayımları Şirkətinin ictimaiyyətlə əlaqələr və monitorinq şöbəsinin müdiri Tahir Məmmədov məlumat verib. İTV rəsmisi qeyd edib ki, müsabiqəyə bu günə kimi Azərbaycan bəstəkarları ilə yanaşı, Türkiyə, İspaniya, Yunanıstan, Rumıniya, Avstraliya, İrlandiya, İsveç, Hollandiya, Norveç, Portuqaliyadan olan bəstəkarlar da mahnılar təqdim edib. Mahnıların qəbulu fevralın 10-da başa çatacaq. Bundan sonra münsiflər heyəti mahnılar arasında seçimin nəticəsini elan edəcək.

Əcnəbi bəstəkarların mahnılarının Azərbaycan təmsilçisinin ifasında səslənməsinə göstərdikləri marağa gəlincə, Tahir Məmmədov qeyd edib ki, bu Azərbaycanın üç il təmsilçilik dövründə qazandığı uğurdan, musiqimizə olan maraqdan irəli gəlir: “Əcnəbi bəstəkarların bu müsabiqəyə mahnı təqdim etməsi sözsüz ki, ölkəmizin uğurları ilə bağlıdır. Təbii ki, Azərbaycan təmsilçilərinin çıxışı, təşkilati məsələlər, Azərbaycanın “Eurovision” müsabiqəsindəki promosion və piar fəaliyyəti böyük maraq yaratdığına görə, onlar öz mahnılarının Azərbaycan tərəfindən təqdim olunmasını istəyirlər. Müsabiqəyə mahnılarının təqdimatının ardı-arası kəsilmir. Üç ilə baxdıqda bu baxımından kifayət qədər çox artım var. Əcnəbi bəstəkarlar İctimai Televiziyaya ünvanlıdıqları məktublarda da Azərbaycanın müsabiqəsindəki layiqli təmsilçiliyini, eləcə də aparılan promosion işlərini yüksək qiymətləndirdiklərini qeyd edirlər. Bunun nəticəsi olaraq bəstəkarlar arasında hətta 4-5 mahnı təqdim edənlər var. Bu müsabiqədə ifa olunması üçün bəstəkarlar istənilən ölkəyə mahnı təqdim edə bilərlər. Bəstəkarların təmsilçi ölkələrə mahnı göndərmələrində heç bir məhdudiyyət yoxdur. “Eurovision”un qaydalarında da göstərilib ki, müəllif istənilən ölkədən ola bilər. Bu məhdudiyyət olmadığına görə də bəstəkarlar mahnılarını böyük maraqla bizə təqdim edirlər”.

Şöbə müdiri qeyd edib ki, “Eurovision-2011” müsabiqəsində Azərbaycan təmsilçisinin Düsseldorf səhnəsində ifa edəcəyi mahnının müəllifinə qonorar ödənilməsi də nəzərdə tutulur. Ancaq bu qonorarın nə qədər olacağı barədə hələlik qəti qərara gəlinməyib.
Builki təmsilçimizin ifa etməsi üçün ən yaxşı mahnının seçiləcəyini deyən T. Məmmədov, yerli və əcnəbi bəstəkarlar arasında fərq qoyulmayacağını diqqətə çatdırıb: “Mahnının yerli və ya əcnəbi müəllifə məxsus olmasına fərq qoyulmayacaq. Ən layiqli və ən yaxşı mahnı müəllifindən asılı olmayaraq Azərbaycanı Düsseldorfda təmsil edəcək”.

Qeyd edək ki, Azərbaycanın 56-cı “Eurovision” müsabiqəsindəki təmsilçisinin kimliyi fevralın 11-də məlum olacaq. Təmsilçimiz münsiflər heyətinin rəsi ilə finalda mübarizə aparacaq İlhamə Qasımova, Eldar Qasımov, Aynişan Quliyeva, İlqarə İbrahimova və Nigar Camal arasından seçiləcək.