Şou-biznes

Ana səhifə

Şou-biznes

“Eurovision-2011” Azərbaycan təmsilçisi adı uğrunda mübarizə aparan beş ifaçı milli finala hazırlaşır - FOTO

“Eurovision-2011” Azərbaycan təmsilçisi adı uğrunda mübarizə aparan beş ifaçı milli finala hazırlaşır - <font color=red>FOTO</font>

08 fevral 2011 12:36 (UTC +04:00)

APA beş ifaçının finala hazırlığı ilə maraqlanıb.

Finalda təmsilçilik uğrunda mübarizə aparacaq İlhamə Qasımova APA-ya açıqlamasında finala xüsusi hazırlaşdığını, bir neçə gözəl geyimlə səhnəyə çıxacağını deyib. Təmsilçiyə namizəd vurğulayıb ki, onun səhnə geyimində qeyri-adilik olmayacaq: “Nəinki geyimdə, ümumiyyətlə heç nədə qeyri-adilik olmayacaq. Bu konsertdir və biz burada gözəl çıxış etməliyik. Gözəl ifa, yüksək səviyyəli çıxış daha önəmli olmalıdır. Hər iştirakçı yeni mahnısını ifa etməlidir, mən də həmin gün öz yeni mahnımı ifa edəcəyəm. Bu gün əminliklə deyə bilmərəm ki, təmsilçi məhz mən olacağam. Bunu heç kim əminliklə deyə bilməz. İnanıram ki, hər şey çox yaxşı və layiqincə olacaq”.

Milli münsiflər heyətinin peşəkarlığına inandığını diqqətə çatdıran İ. Qasımova bildirib ki, bu baxımdan rahatdır və təmsilçi adını layiqli ifaçının qazanacağına inanır: “Günümün demək olar ki, bütün hissəsini finala hazırlığa sərf edirəm. Mahnıları dəfələrlə oxuyuram, hazırlayıram. Mənə dəstək olan və mənim təmsilçi olmamı istəyən hər bir insana, bütün Azərbaycan xalqına dəstəkverici sözlərinə görə minnətdarlıq edirəm. Zirvəyə qalxan hər bir sənətçi məhz tamaşaçının dəstəyi ilə o zirvəni fəth edir”.

İ. Qasımova onu da açıqlayıb ki, münsiflər heyətinin son qərarı ilə razılaşacaq: “Burada söhbət məndən və ya başqa birindən yox, Azərbaycanımızdan gedir. Əgər son qərar mənim özüm üçün yaxşı olmasa belə pis olmayacağam. Deməli ki, peşəkar münsiflər belə məsləhət bilib və kimi seçsələr, onun daha yaxşı olacağına inanırlar. Təmsilçilik hüququ qazanan hər bir ifaçı var-gücü ilə çalışıb Vətəni layiqincə təmsil etməlidir”.

Təmsilçi olacağı təqdirdə Azərbaycanı bu mötəbər yarışmada yüksək səviyyədə təmsil edəcəyini vurğulayan İ. Qasımova birinciliyi Vətənə gətirəcəyi üçün var-gücü çalışacağını deyib.

Final öncəsi qızğın iş prosesində olan və yüksək səviyyəli perfomans nümayiş etdirmək üçün gününün əksər saatını məşqə sərf edən Eldar Qasımov APA-ya açıqlamasında bildirib ki, həmin gün səhnədə xüsusi geyimlərdə olacaq. Onu səhnədə milli seçimlərdə ilk gündən bir yerdə olan rəqqaslar və bek-vokalçılar Kazım və Miya müşayiət edəcək. Tamaşaçılar həmin gün E. Qasımovun ifasında üç xarici, bir Azərbaycan mahnısını dinləmək imkanı qazanacaq: “Bu mahnılar arasında mahnı müsabiqəsinə təqdim edilən mahnı yoxdur. Təmsilçi adını qazanmaqda beş finalçının hər birinin şansı eynidir, hərəmizə 20 faiz düşür. Ümid edirəm ki, təmsilçi məni seçəcəklər. Fikrimcə, burada üstünlük səs və perfomansa, qabiliyyətə veriləcək, burada oğlan-qız söhbəti olmayacaq”. Təmsilçiliyə namizəd onu da açıqlayıb ki, həmin gün ifa edəcəyi “Gəl ey səhər” mahnısının ona uğur gətirəcəyinə inanır.

APA-nın fianal hazırlıqları ilə bağlı suallarını cavablandıran İlqarə İbrahimova qeyd edib ki, həmin gün üçün eksklüziv geyimlərini Arzu Məlikzadə hazırlayır: “Finalda Azərbaycan və ingilis dillərində mahnı oxuyacağam. Mən öz gücümə inanıram və uğur qazanacağıma ümid edirəm”.

Azərbaycanı 56-cı “Eurovision” müsabiqəsində təmsil etməyə namizədlərdən Aynişan Quliyeva APA-ya açıqlamasında gününün əsas hissəsini finala hazırlığa sərf etdiyini deyib: “Nə qədər işləsəm belə, yorulmuram, hər kiçik nüansı canla-başla həyata keçirirəm. Çünki “Eurovision”a getmək mənim məqsədimdir. Yorulmamışam, enerjim çox böyükdür. Finalda hər şey çox gözəl olacaq və özümü hərtərəfli göstərməyə çalışacağam”.

A. Quliyeva həmin gün ifalarından birini milli seçimlərdə iştirak edən, ancaq finala vəsiqə qazanmayan Adil Baxışlı ilə birgə təqdim edəcəyini açıqlayıb. Sözügedən mahnının sözləri və bəstəsi də Adil Baxışlıya məxsusdur və o, bu mahnı da A. Quliyevanın bek-vokalçısı qismində çıxış edəcək. Gənc müğənninin səhnə geyimini isə əməkdar incəsənət xadimi, modelyer Fəxriyyə Xələfova hazırlayır: “Düşünürəm ki, hər şey yaxşı olacaq. Digər iştirakçılardan üstünlüyümü tamaşaçılar daha yaxşı bilər. Mən səhnədə dayanıb oxumuram, çalışıram ki, hər baxımdan möhtəşəm perfomans nümayiş etdirim. Hər bir çıxışım dünya səviyyəli olsun. Digərlərindən fərqim ondadır ki, səhnədə hamıdan çox hərəkətli olan mənəm...”

“Eurovision-2011” müsabiqəsində Azərbaycanı təmsil etmək iddiasında olan Nigar Camal da final konsertinə hazırlaşır. Müğənninin prodüseri və bəstəkar İsa Məlikov APA-ya açıqlamasında bildirib ki, həmin gün üçün digər ifaçılar kimi o da 4 mahnı hazırlayır. Nigar Camalı final konsertinə stilist Anar Ağakişiyev hazırlayır. Finalçını səhnədə rəqsləri ilə “Neiro” rəqs qrupu müşayiət edəcək: “Final konserti üçün hər şeyi xüsusi hazırlayırıq. Nigar onun üçün yazılmış mahnını ifa edəcək. Nigar bütün gücünü səfərbər edərək finala hazırlaşır”. İ. Məlikov vurğulayıb ki, nəticənin necə olmasından asılı olmayaraq hər bir durum onları qane edəcək, çünki son qərarı peşəkar münsiflər heyəti verəcək.