Şou-biznes

Şou-biznes

İqor Krutoyun Bakıdakı yaradıcılıq gecəsi bir sıra məqamlarla diqqət çəkib - FOTOSESSİYA

İqor Krutoyun Bakıdakı yaradıcılıq gecəsi bir sıra məqamlarla diqqət çəkib - <font color=red>FOTOSESSİYA</font>

02 mart 2011 22:34 (UTC +04:00)

Bakı. Ülkər Qasımova – APA. Martın 2-də Heydər Əliyev Sarayında gözlənilən və uzun müddətdir müzakirə olunan konsert proqramı uğurla baş tutub. APA-nın məlumatına görə, paytaxtın ən böyük səhnəsində rusiyalı bəstəkar İqor Krutoyun yaradıcılıq gecəsi anşlaqla baş tutub. Üç saatlıq konsert boyunca Rusiya estradasının ən tanınmış simaları Aleksandr Serov, Layma Vaykule, Valeriy Leontyev, Krisitina Orbakayte, İrina Alleqrova, Filipp Kirkorov yaddaqalan çıxışları ilə Bakı tamaşaçılarını heyrətə gətiriblər. Konsertin sonunda Lara Fabianın İqor Krutoya məxsus bir neçə mahnını ifa etməsi zaldakı tamaşaçıların marağına səbəb olub.

Konsert üçün Heydər Əliyev Sarayının səhnəsi xüsusi hazırlanmışdı. Rusiya televiziya kanallarında görməyə öyrəşdiyimiz sadə, lakin göz oxşayan səhnə dekorasiyası bu dəfə Bakıda quraşdırılmışdı. Qırmızı pərdə ilə bəzədilmiş səhnənin arxası rəngli işıqlarla daha da qeyri-adi görünürdü. Lakin qeyri-adi, rəngarəng səhnə dekorasiyası İqor Krutoyun səhnəyə çıxması ilə gözdən itdi. Bəstəkarı elə hər zaman görməyə alışdığımız kimi, bu dəfə də qara royal arxasından izlədik. İqor Krutoy bu səhnədə çıxışından öncə Bakıda yaradıcılıq gecəsinin keçirilməsindən məmnun olduğunu dilə gətirib. Səmimi bəstəkar Azərbaycanın ona çox yaxın olduğunu da deyib və bunun üç səbəbini açıqlayıb: “İlk əvvəl ona görə ki, mənim dostum və dahi sənətkar Müslüm Maqomayev buralıdır. İkinci səbəb ona görə ki, Azərbaycan xalqı çox istedadlıdır. Üçüncü səbəb isə odur ki, mənim qayınanam Bakıda anadan olub”. Bəstəkarın yaradıcılıq gecəsinin izləyicisi olmaq üçün Heydər Əliyev Sarayına toplaşan çoxsaylı tamaşaçıları salamladıqdan sonra, İqor Krutoy royal arxasına keçərək, illərdir dinləməkdən usanmadığımız əsərlərinin ifasına başlayıb. Bu gecə səslənən bütün mahnılar çoxlarının pərəstiş etdiyi İqor Krutoy barmaqlarının yaratdıqları möcüzələr idi. Bəstəkarı səhnədə öz orkestri müşayiət edib. İlk əvvəl səhnəyə Rusiyanın xalq artisti Aleksandr Serov çıxıb. Sevilən müğənni Azərbaycanın Rəşid Behbudov, Müslüm Maqomayev və Polad Bülbüloğlu kimi görkəmli simalar yetişdirdiyindən qürurlandığını deyib. A. Serov bu konsertdə üç mahnı ilə tamaşaçıları sevindirib. Daha sonra səhnəyə çıxan Layma Vaykule çıxıb. Müğənni maraqlı çıxışı və səmimi söhbəti ilə tamaşaçıların alqışlarını qazanıb. Bakı tamaşaçısına önəm verdiyini hər dəfə möhtəşəm çıxışı ilə nümayiş etdirən Valeriy Leontyev, elə bu dəfə ənənəsinə sadiq qalıb. Valeriy Leontyev həmin gecə çoxsaylı tamaşaçının əyləşdiyi zala enən yeganə müğənni olub. O bir mahnısını məhz tamaşaçıların ətrafında ifa edib. Kristina Orbakaytenin çıxışı da maraq doğurub.

Konsertdə nəzərdən qaçırmadığımız məqamlardan biri də İqor Krutoyun İrina Alleqrovanı “sizin yerliniz” kimi təqdim etməsi olub. Müğənnini dəfələrlə “bakılı” kimi qeyd edən İqor Krutoyun səsinə hay verən olmayıb. Elə İrina Alleqrovanın özü də buna qoşulmayıb. Səhnəyə gələr-gəlməz mahnısının ifasına başlayan sənətçi, nə Azərbaycan xalqını salamlayıb, nə də ona təqdim edilən gül dəstələrindən şövqə gəlib. Sözügedən müğənninin Bakı səhnəsində ürəksiz çıxış etdiyi də nəzərdən qaçmayıb. İ. Alleqrova nə Filipp Kirkorov kimi bu səhnədə konsert verməkdən məmnunluğunu dilə gətirib, nə də tamaşaçılara təşəkkür edib. O, “İqor, görürsən də bu sənin yaradıcılığının böyüklüyüdür” deməklə kifayətlənib. Daha sonra səhnəyə hər bir çıxışında Azərbaycana sevgisini etiraf edən və daima Bakıda konsert vermək arzusunda olan Filipp Kirkorov gəlib. O isə həmkarından fərqli olaraq Azərbaycan xalqına yorulmadan təşəkkürlərini ünvanlandırıb. Səhnədə çox xoşbəxt görünən Kirkorov, ən kiçik pərəstişkarına belə diqqətlə yanaşıb. F.Kirkorov ilk mahnısını ifa edərkən texniki problem yaranıb və müğənni mahnının bir hissəsini mikrofonun səsi çıxmadan oxumaq məcburiyyətində qalıb. Müğənni bu səhnədə 4 mahnı ifa edib ki, onun ifasını rəqqaslar müşayiət edib. Onu da bildirək ki, proqram boyunca İqor Krutoy həm royalda solo ifa, həm də bir neçə müğənni ilə duet oxuyub.

İqor Krutoyun Bakıdakı yaradıcılıq gecəsi Lara Fabianın möhtəşəm ifası ilə yekunlaşıb. Lara Fabian Bakıda ilk dəfə çıxış etdiyini desə də, bunun davamı olacağına da söz verib. İqor Krutoyun məhz Lara Fabian üçün yazdığı bir neçə mahnının canlı ifası tamaşaçılara zövq verib. Konsertin sonunda isə Bakıda qonaq olan müğənnilərin hamısı səhnəyə çıxaraq, birlikdə son mahnılarını təqdim ediblər. İqor Krutoyun yaradıcılıq gecəsi tamaşaçıların 10 dəqiqə ərzində ayaqüstü alqışları ilə yekunlaşıb.

Konsertdə müğənnilərin təhlükəsizliyinin qorunması üçün xüsusi mühafizə xidməti sarayın ətrafında olub. Konsertdən sonra da hər bir qonaq polislərin mühafizəsi ilə avtomobillərinə əyləşib oranı tərk ediblər.