Diaspor

Ana səhifə

Diaspor

Azərbaycanın dövlət müstəqilliyinin bərpasının 20-ci ildönümünü müxtəlif ölkələrdə yaşayan azərbaycanlılar tərəfindən qeyd olunur

17 oktyabr 2011 12:42 (UTC +04:00)

Bakı-APA. Dünyanın müxtəlif ölkələrində yaşayan azərbaycanlılar Azərbaycan Respublikasının Dövlət Müstəqilliyinin bərpasının 20-ci ildönümünü qeyd edirlər. Diasporla İş üzrə Dövlət Komitəsinin (DİDK) mətbuat xidmətindən APA-ya verilən məlumata görə, Rusiya Federasiyasının Moskva, Sankt-Peterburq və digər şəhərlərində Ümumrusiya Azərbaycanlıları Konqresi, Heydər Əliyev Fondunun Rusiya nümayəndəliyi və Rusiyanın Azərbaycanlı Gənclər Təşkilatının təşkilatçılığı bir sıra tədbirlər keçirilir. Müstəqillik gününə həsr olunmuş tədbirlər postsovet məkanının digər ölkələrində - Gürcüstan, Ukrayna, Belarus, Latviya, Litva, Estoniya, Qazaxıstan, Özbəkistan və Qırğızıstanda yaşayan azərbaycanlılar tərəfindən də qeyd olunur.

Latviyada fəaliyyət göstərən “Ocaq” Mədəniyyət Mərkəzi Azərbaycan Respublikası Diasporla İş üzrə dövlət Komitəsinin (DİDK) dəstəyi ilə Riqa şəhərində “Azərbaycan beynəlxalq münasibətlər sistemində” mövzusunda konfrans keçirilib, həmçinin Azərbaycanın dövlət müstəqilliyinin bərpasının 20-ci ildönümünə həsr olunmuş sərginin açılışı olub. Oktyabrın 18-də Estoniyanın paytaxtı Tallində Estoniya-Azərbaycan parlament qrupu, Bakılılar Klubu, “Aydan” Estoniya-Azərbaycan Mədəniyyət Mərkəzinin təşkilatçılığı ilə tədbir və sərgi keçiriləcək. Tədbirdə Azərbaycan diasporunun nümayəndələri ilə yanaşı, dövlət, hökumət, parlament, diplomatik korpus və qeyri hökumət təşkilatlarının nümayəndələri iştirak edəcək.
Eyni zamanda Estoniya parlamentində “Azərbaycan Respublikasının Avropa Birliyinin enerji təhlükəsizliyinin təmin olunmasında rolu” mövzusunda konfrans olacaq.
20 oktyabr tarixində Litva seymində DİDK-in dəstəyi ilə Litva Azərbaycanlıları Cəmiyyətinin və Litva-Azərbaycan Assosiasiyasının təşkilatçılığı ilə beynəlxalq konfrans keçiriləcək.
Heydər Əliyev Fondunun Rumıniya nümayəndəliyi, Azərbaycanın Rumıniyadakı səfirliyi və DİDK ilə birlikdə Buxarestdə A Müstəqillik Gününə həsr olunmuş konfrans baş tutub. “Macar-Azərbaycan dostluq Cəmiyyəti” Azərbaycanın bu ölkədəki səfirliyi ilə birlikdə Müstəqillik gününü konfrans keçirməklə qeyd ediblər. İsveçdə fəaliyyət göstərən “Xəzər” Azərbaycan-İsveç Dostluq Cəmiyyətinin təşkilatçılığı ilə seminar keçirilib. Seminar çərçivəsində “Mən fəxr edirəm ki, Azərbaycanlıyam” filmi nümayiş etdirilib, tədbir vətənpərvər ruhda söylənən şerlərdən ibarət “Şərq gecəsi” davam edib.
İsveçdə fəaliyyət göstərən “Qarabağ” Cəmiyyəti, “Azərbaycan Federasiyası - İsveç” təşkilatı da ayrı-ayrılıqda Müstəqillik Günü münasibətilə müvafiq olaraq toplantı və bayram konserti keçiriblər.
Finlandiyanın Helsinki şəhərində Finlandiya Azərbaycanlıları Assosiasiyasının təşkilatçılığı Helsinkinin mərkəzində yerləşən Scandic Marski hotelinin böyük iclas zalında “Heydər Əliyev müstəqil Azərbaycan dövlətinin qurucusudur” adlı tədbir olub. Tədbirdə Türkiyə səfirliyinin nümayəndələri, Finlandiya Türk və Finlandiya Tatar Cəmiyyətlərinin, fin xalqının nümayəndələri iştirak edib.

Finlandiyada Müstəqillik gününəm həsr olunmuş daha bir tədbir 23 oktyabr tarixində Helsinki şəhərində keçiriləcək.
Danimarkada yaşayan azərbaycanlılar isə Müstəqillik Gününü “Azad Azərbaycan” adlı bədii gecənin keçirilməsi ilə qeyd ediblər. Danimarkada fəaliyyət göstərən “Vətən” Cəmiyyətinin təşkil etdiyi tədbirdə Azərbaycanın tarixi, mədəniyyəti, iqtisadiyyatının inkişafı barədə kitab və bröşürlər, sənədli film nümayiş etdirilib. Müstəqillik Günü ilə əlaqədar tədbirlər Almaniyanın Berlin və Drezden şəhərlərində də keçirilib.

Müstəqillik Günü ilə bağlı tədbirlərin Fransa, Böyük Britaniya, Norveç və İtaliyada da keçirilməsi nəzərdə tutulub. İtaliyada fəaliyyət göstərən “İtaliya-Azərbaycan Mədəniyyət Assosiasiyası”nın, “Azəri” Cəmiyyətinin təşkilatçılığı ilə Milanda konfrans, sərgi və konsert proqramı təşkil olunacaq.
Məlumata görə, Türkiyədə Azərbaycanın dövlət müstəqilliyinin bərpasının 20-ci ildönümü münasibətilə Türkiyənin parlament və hökumət nümayəndələrinin iştirakı ilə möhtəşəm tədbirin keçirilməsi planlaşdırılıb. Birləşmiş Ərəb Əmirliklərində fəaliyyət göstərən “Azərbaycan” Cəmiyyətinin təşkilatçılığı ilə silsilə tədbirlər keçirilib, ölkənin ən nüfuzlu mətbu orqanlarında biri olan “Əl-Bayan” qəzetində Azərbaycana dair məqalə dərc edilib.

Dövlət Müstəqilliyi Günü ABŞ, Kanada və Meksikada yaşayan azərbaycanlılar tərəfindən də qeyd olunur. ABŞ-ın Vaşinqton, Nyu-York, Hyuston şəhərlərində USAN, Amerika-Azərbaycan Gənclər Təşkilatının təşkilatçılığı ilə toplantı və seminarlar keçirilib.
Hyuston-Bakı Qardaşlaşmış Şəhərlər Assosiasiyasının təşkilatçılığı ilə Hyuston şəhərinin meriyasının binasında Dövlət Müstəqilliyi Günü münasibətilə ziyafət verilib. Kanadanın Monreal və Kalqori şəhərlərində müvafiq olaraq Kvebek Azərbaycanlıları Assosiasiyası və Alberta-Azərbaycan Mədəniyyət Mərkəzinin təşkilatçılığı ilə tədbirlərin keçirilməsi nəzərdə tutulub. Kanadanın Ontario vilayətinin London şəhərində Azərbaycan Respublikasının Dövlət Müstəqilliyinin bərpasının 20-ci ildönümünə həsr olunmuş tədbir isə artıq baş tutub. Oktyabrın 16-da Azərbaycan Kanada Türk Assosiasiyasının təşkilatçılığı ilə Platts Lane Community Centre-də keçirilən tədbirdə Azərbaycan və Türk diasporlarının nümayəndələri ilə yanaşı yerli ictimaiyyətin nümayəndələri də iştirak edib. Latın Amerikasındakı Azərbaycan Assosiasiyası ölkəmizin Meksikadakı səfirliyi ilə birlikdə Dövlət Müstəqilliyi Günü ilə əlaqədar Mexikoda şəhərin ən tanınmış teatrlarından olan Palacio de Bellas Artes-də tədbir keçirəcək. Azərbaycanın dövlət müstəqilliyinin bərpasının 20-ci ildönümünə həsr olunmuş tədbirlərin Avstraliya və Yeni Zelandiyada da keçirilməsi nəzərdə tutulub.

dövlət müstəqilliyi _ diaspor