Diaspor

Ana səhifə

Diaspor

İraq türkmənlərinin nümayəndəsi: “Bizim ürəyimizdə Azərbaycanın çox fərqli yeri var” – MÜSAHİBƏ

İraq türkmənlərinin nümayəndəsi: “Bizim ürəyimizdə Azərbaycanın çox fərqli yeri var” – <font color=red>MÜSAHİBƏ</font>

31 oktyabr 2011 11:21 (UTC +04:00)

Bakı. Pərvin Abbasov – APA. İraqda fəaliyyət göstərən Kərkük Xəbər Agentliyinin təmsilçisi Ersan Sarıkahya APA-ya müsahibə verib.

- İraqdakı Kərkük türkmənlərinin hazırkı durumu necədir?

- Biz 85 il yaşadığımız problemləri, o cümlədən Səddamın zülmünü heç yerdə eşitdirə bilməmişik. Bunun səbəbi isə media embarqosu yaşamağımızdır. Media embarqosu nəticəsində çoxsaylı insanımız boş yerə yox oldu. Onların bir günahı vardı: türk olmaları.

İraq türkmənlərinin ürəyində Azərbaycanın çox fərqli yeri var. Çünki eyni dildə danışmağımız, eyni mədəniyyətin daşıyıcısı olmağımız təsadüf ola bilməz. Biz bir zamanlar o torpaqlara köçmüşük. Amma heç vaxt kimsəyə zərər verməmişik, o torpaqlara yalnız mədəniyyət gətirmişik. Heç bir etnik qrupa qarşı olmamışıq. Amma əvəzində bütün etnik qruplar bizə qarşı daim birləşiblər.

- Kərkük Xəbər Agentliyinin Azərbaycan mediası ilə münasibətləri hansı səviyyədədir?

- Biz İctimai Televiziya və Radio Yayımları Şirkəti ilə ortaq protokol imzalamışıq. Amma çox istərdik ki, digər telekanallar və mətbuat orqanları ilə də çalışaq, əməkdaşlıq edək. Bizim burada söz haqqımız olmalıdır. Biz həmişə Azərbaycana ana vətən, Türkiyəyə ata vətən kimi baxırıq.

- Kərkük türkmənlərinin daha çox hansı problemləri var?

- Səddam Hüseyndən sonrakı vəziyyəti deyəcəyəm. Hazırda məktəb problemimiz var. Uşaqları da, tələbələri də yaxşı məktəblərə qoya bilmirik. Halbuki İraq əhalisinin etnik bölgüsünə görə sayca üçüncüyük. Bizim məktəb, universitet açmaq, öz dilimizdə təhsil almaq haqqımız olmalıdır. Amma bunlar yoxdur. Dövlət bizə lazımınca kömək etmir. Çünki biz orada tərəf tutmamışıq, biz daxili mübarizədə tərəfsiz qaldıq. Türk milləti olaraq yalnız sülh tərəfdarıyıq. Düzdür, İraq parlamentində bizim millətdən olan 10 nəfər millət vəkili var. Amma onları da bağlı qapılar arxasında əzməyə çalışırlar, səsləri yetmir. Millət vəkillərimiz etdikləri az deyil, yenə də ümumi duruma baxanda vəziyyət ürəkaçan deyil. Məsələ burasındadır ki, biz səsimizi dünyaya çatdıra bilmirik. Sayca üçüncü etnik qrup olmağımıza baxmayaraq, bizi eşitmirlər. Çünki xarici mətbuat bizimlə işləmir.

- İraq türkmənlərinin sayı ilə bağlı müxtəlif rəqəmlər səslənir, real say nə qədərdir?

- Bəziləri bizim sayımızı bir neçə min göstərməyə çalışır. Amma 1957-ci ildə rəsmi rəqəmlərlə sayı 1 milyon olan bir toplum o vaxtdan indiyədək azı iki dəfə artmalıdır, yəni 2 milyon olmalıdır. Axı necə bir neçə min ola bilərik? Mümkün deyil. Real rəqəm 3 milyondan çoxdur.