Diaspor

Ana səhifə

Diaspor

Leyla Əliyeva: “İnanırıq ki, “Bakı” jurnalının ingilis dili versiyası da rus dili versiyası kimi uğurlu olacaq” - FOTOSESSİYA

Leyla Əliyeva: “İnanırıq ki, “Bakı” jurnalının ingilis dili versiyası da rus dili versiyası kimi uğurlu olacaq” - <font color=red>FOTOSESSİYA</font>

10 noyabr 2011 12:06 (UTC +04:00)

Moskva. Fərid Əkbərov - APA. Rusiyanın paytaxtında “Bakı” jurnalının ingilis dili versiyasının təqdimetmə mərasiminə həsr olunan mətbuat konfransı keçirilib. APA-nın Moskva müxbirinin verdiyi məlumata görə, mətbuat konfransında jurnalın baş redaktoru, Heydər Əliyev Fondunun vitse-prezidenti, Rusiya Azərbaycan Gəncləri Təşkilatının (RAGT) sədri, “Ətraf mühitin mühafizəsi fəaliyyəti üzrə beynəlxalq dialoq” kampaniyasının (International Dialoguae for Environmental Action - IDEA) təşəbbüsçüsü Leyla Əliyeva və İTAR-TASS agentliyinin direktor müavini Mixayıl Qusman iştirak ediblər.

M. Qusman çıxışında “Bakı” jurnalının rus dili versiyasının artıq öz oxucularını tapdığını söyləyib: “Jurnalın ingilis dili versiyasının da bu uğuru əldə edəcəyinə əminəm”.

Leyla Əliyeva “Bakı” jurnalının rus dili versiyasının artıq 4 ildir ki, çap olunduğunu söyləyib. Onun sözlərinə görə, hələ o dövrdən jurnalın beynəlmiləl versiyası buraxmaq niyyətləri olub: “Jurnalın ingilis dili versiyasının birinci nömrəsi çapdan çıxıb. Bu versiyanı çap etmək asan olmayıb, bu iş 4 il vaxt aparıb. İngilis dili versiya rus dili versiyanın təkrarı, yəni tərcüməsi deyil. Tərcüməsi olsaydı, onda asan olardı. İnanırıq ki, bu versiya da rus dili versiyası kimi uğurlu olacaq”.

Leyla Əliyeva dünyanın bir çox şəhərində jurnalın ingilis dili versiyasının təqdimetmə mərasimini keçirəcəklərini söyləyib. O bu şəhərlər arasında Nyu-York, Berlin, Roma və Paris kimi şəhərlərin olacağını bildirib: “Jurnalın rus versiyası Estoniyada, ingilis dili versiyası isə Londonun “Conde Nast” nəşriyyat evində çap olunur”.

Leyla Əliyeva dünyanın məşhur dizayner, rəssam və fotoqrafları ilə əməkdaşlıq etdiklərini söyləyib: “Jurnalın məqsədi ingilisdilli oxucunu yalnız Xəzər sahillərindəki Odlar Yurdunun qədim mədəniyyəti, zəngin tarixi, gözəl və müdrik adətləri ilə tanış etmək deyil, həm də azərbaycanlıların müasir həyatı haqqında məlumatlandırmaqdan ibarətdir. “Bakı” jurnalı dünyaya Azərbaycanı və onun paytaxtını yenidən kəşf etməkdə, onun xalqının ən gizli və yaxşı cəhətlərini üzə çıxarmaqda kömək edəcək”.

Leyla Əliyeva “Bakı” jurnalının mart ayı buraxılışının Bakıda keçiriləcək “Eurovision” musiqi müsabiqəsinə həsr olunacağını bildirib. Onun sözlərinə görə, bu yarışmanı izləməyə gələn xarici ölkə vətəndaşları jurnal vasitəsi ilə Azərbaycanla əvvəldən tanış ola biləcəklər.

Qeyd edək ki, “Bakı” jurnalının ingilis dili versiyasının təqdimat mərasimi sabah Moskvada “ART Muzey Multimedia”da keçiriləcək.