Diaspor

Ana səhifə

Diaspor

Azərbaycanın gənc oftalmoloqları Amerika Oftalmologiya Akademiyasının jurnalında ermənilərin çap etdirdiyi məqaləyə etiraz bildiriblər

21 noyabr 2011 16:25 (UTC +04:00)

Bakı – APA. Amerika Oftalmologiya Akademiyasının beynəlxalq nəşrlərindən biri olan “EyeNet” jurnalında “From Armenia to Tanzania: The Eyes of Hope and Change” (Ermənistandan Tanzaniyaya qədər: Ümid və dəyişiklik gözləyən gözlər) adlı məqalə dərc olunub (http://www.aao.org/aao/publications/eyenet/200811/international.cfm).

Məqalədə ABŞ-da çalışan Ohanesyan soyadlı erməni əsilli oftalmoloqun ötən əsrin 90-cı illərinin əvvəllərində Ermənistana və Dağlıq Qarabağa səfəri zamanı gördükləri və düşündükləri dərc olunub. Onun sözlərinə görə, Dağlıq Qarabağ XX əsrin 30-cu illərində Stalin tərəfindən Azərbaycanın ərazisinə daxil edilib və buna dözməyən erməni xalqı SSRİ dağıldıqdan sonra 1992-93-cü illərdə öz müstəqilliyi naminə Qarabağda mübarizəyə başlayıb. Apardıqları mübarizə zamanı ermənilər azərbaycanlılar tərəfindən vəhşicəsinə məhv edilib, Azərbaycanın başladığı müharibə nəticəsində minlərlə erməni şikəst olub.

Məqalə ilə əlaqədar Azərbaycanın bir qrup gənc oftalmoloqu - Tural Qəlbinur, Arifə Məmmədli, Səkinə İsmayılova, Faiq Orucov və Emin Əlihüseynli Amerika Oftalmologiya Akademiyasının rəhbərliyinə və “EyeNet” jurnalının baş redaktoruna çox sərt etiraz məktubu göndəriblər. Müasir Oftalmologiyanın İnkişafına Yardım Birliyinin sədri Emin Əlihüseynlinin APA-ya verdiyi məlumata görə, məktubda reallığın heç də məqalədə qeyd edildiyi kimi olmadığı, əslində ermənilərin deyil, azərbaycanlıların bu müharibədə zərərçəkən olduğu, məhz Azərbaycan ərazilərin işğal altında olması və Xocalı soyqırımı barədə məlumatlar qeyd edilib, həmçinin oftalmoloji jurnalda siyasi xarakterli məqalənin çap olunmasına təəssüf ifadə olunub.

Emin Əlihüseynlinin sözlərinə görə, beynəlxalq oftalmologiyada böyük nüfuza malik olan “EyeNet” jurnalına göndərilən məqalələrin heç də hamısı dərc olunmur: “Ancaq bizim gənc oftalmoloqların hazırladığı etiraz məktubu nəinki çap olunub, hətta göndərilmiş məktuba cavab olaraq “EyeNet” jurnalının baş redaktoru və Amerika Oftalmologiya Akademiyasının rəhbərliyi bu xarakterli məqalənin dərc olunmasına və məqalədə Azərbaycan tərəfinin mövqeyinin əks edilməməsinə görə təəssüf etdiyini bildirib, gələcəkdə bu cür məqalələrin nəşrinə icazə verilməsində daha diqqətli olacağına söz verib”.

http://www.aao.org/publications/eyenet/201101/letters.cfm#four