Diaspor

Ana səhifə

Diaspor

Ərzurum Atatürk Universitetində Azərbaycanın dövlət müstəqilliyi qazanmasının 20-ci ildönümü ilə bağlı möhtəşəm tədbir keçirilib - FOTOSESSİYA

Ərzurum Atatürk Universitetində Azərbaycanın dövlət müstəqilliyi qazanmasının 20-ci ildönümü ilə bağlı möhtəşəm tədbir keçirilib - <font color=red>FOTOSESSİYA</font>

05 dekabr 2011 09:11 (UTC +04:00)

Ərzurum-APA. Ərzurum Atatürk Universitetində Avrasiya İqtisadi Əlaqələr Dərnəyinin, Avrasiya Vətəndaş Cəmiyyəti Əməkdaşlıq Təşkilatının, Ərzurum Əziziyyə bələdiyyəsinin təşkilatçılığı ilə Azərbaycanın dövlət müstəqilliyinin 20-ci ildönümü ilə bağlı “Müstəqilliyinin 20-ci ilində Azərbaycan-Türkiyə münasibətləri” adlı beynəlxalq konfrans keçirilib. APA-nın məlumatına görə, “Bir ürəkdə iki can: Türkiyə - Azərbaycan” şüarı ilə toplanan konfransda Azərbaycan və Türkiyənin millət vəkilləri, tanınmış siyasətçilər, elm adamları, siyasi analitiklər, tələbələr, media mənsubları və digər təbəqələrin insanları iştirak ediblər.

Təbdir hər iki ölkənin azadlığı və müstəqilliyi uğrunda həlak olmuş şəhidlərin ruhunun bir dəqiqəlik sükutla yad edilməsi və Türkiyə-Azərbaycanın dövlət himnlərinin ifası ilə başlayıb.
Tədbiri giriş sözü ilə Avrasiya İqtisadi Əlaqələr Dərnəyinin başqanı, “Ekoavrasiya” jurnalının baş redaktoru Hikmet Eren açaraq, Azərbaycanın 20 ildə əldə etdiyi uğurlardan danışıb. Natiq xüsusilə, son iyirmi ildə Türkiyə-Azərbaycan arasında imzalanan önəmli sazişləri qeyd edərək, bu gün iki dövlət arasında siyasi-iqtisadi və strateji əlaqələrin yüksələn xətlə inkişafını vurğulayıb.

Avrasiya Vətəndaş Cəmiyyəti Əməkdaşlıq Təşkilatının sədr müavini Kutluhan Yazıcıoğlu belə tədbiri keçirməkdən məmnun olduqlarını bildirərək, bu gün Azərbaycanın bölgədə söz sahibə çevrilən bir dövlət halına gəldiyini bildirib.

Əziziyyə bələdiyyə başqanı Fateh Cengez əsrin əvvəllərində Ərzurumun müdafiəsində Azərbaycan türklərinin böyük rolunu vurğulayaraq, Azərbaycanın iyirmi faiz torpaqlarının erməni işğal altında olduğunu və bu torpaqların gec-tez erməni işğalından azad olunacağını söyləyib.

AKP Adana millət vəkili Necdet Ünüvar Türkiyənin istiqlal savaşında Azərbaycanın maddi və mənəvi yardım etdiyini xatırladıb. Necdet Ünüvar Van zəlzələsində Türkiyənin yardımına qaçan ilk ölkənin dost və qardaş Azərbaycan olduğunu diqqətə çəkərək ölkəmizə təşəkkür edib.

Ərzurum Texnik Universitetinin rektoru Müəmmər Yaylalı iki ölkə arasında qardaşlığa diqqət çəkdi. Yaylalı Ərzurumda Azərbaycanın müstəqilliyinin 20 illiyinin qeyd olunmasının qürurunu yaşadıqlarını ifadə edərək ”Elə bir qardaşlığımız, elə bir bağımız var ki, bu, dünya döndükcə davam edəcək. Azərbaycan gözümüz, bəbəyimizdir” deyib.

Qara Dəniz Ölkələri Parlament Assambleyasının sədri, millət vəkili İsmayıl Safi Azərbaycanın beynəlxalq arenada söz sahibinə çevrildiyini diqqətə çatdıraraq, Türkiyə-Azərbaycanın beynəlxalq arenada bir-birlərinə dəstək verdiklərini söyləyib.

AKP millət vəkili Feramez Üstün Azərbaycanın müstəqilliyinin 20-ci il dönümü qeyd edilməsindən çox xoşbəxt olduğunu söyləyərək, hələ 1990-cı il 20 yanvar hadisələri zaman Universitetdə tələbə olarkən rus əsgərlərinin törətdiyi faciəyə qarşı etiraz aksiyaları keçirdiklərini bildirib.

Azərbaycanın Qarsdakı baş konsulu Ayxan Süleymanov çıxışında iki qardaş ölkə arasında münasibətlərin qurulmasında ümummilli lider Heydər Əliyevin böyük rolunu qeyd edərək, bundan sonra bu əlaqələrin daha da inkişaf edəcəyini söyləyib.

Azərbaycan Milli Məclisinin deputatı Qənirə Paşayevanın “Azərbaycan Dağlıq Qarabağın Ermənistanın işğalı altında qalmasını heç bir zaman qəbul etməyəcək və biz birlikdə torpaqlarımızı işğaldan azad edəcəyik. İnşallah, Azərbaycanın dövlət müstəqilliyinin 21-ci ildönümünü biz birlikdə işğaldan azad edəcəyimiz Dağlıq Qarabağımızda keçirərik”, - sözləri alqışlarla qarşılanıb.

Azərbaycan Milli Məclisinin Türkiyə-Azərbaycan Dostluq Qrupunu rəhbəri, professor Nizami Cəfərov da Türkiyə və Azərbaycan arasında sosial-iqtisadi, mədəni və siyasi əlaqələrinin güclənərək davam etdiyini söyləyib.

Türkiyə-Qazaxıstan Parlament Dostluq Qrupunun rəhbəri, millət vəkili Haluk İpək isə Qarabağ işğalı aradan qalxmayınca, Türkiyə-Ermənistan sərhədlərinin açılmayacağını qeyd edərək, Azərbaycanın dost və qardaş ölkə olduğunu bildirib.

Sonda hər iki ölkənin mədəni-ictimai əlaqələrinin inkişafında xidmətlərinə görə, Türkiyə millət vəkilləri, ziyalıları Dünya Gənc Türk Yazarlar Birliyinin təsis etdiyi “Bəxtiyar Vahabzadə” Ödülünə; Azərbaycanlı millət vəkilləri Qənirə Paşayeva və Nizami Cəfərov isə Avrasiya İqtisadi Əlaqələr Dərnəyinin Türk dünyasına Xidmət ödülünə layiq görülüblər.

Sonra konfrans öz işini bölmələr üzrə davam etdirib. Bölmələrdə Azərbaycan və Türkiyədən olan elm adamları, QHT rəhbərləri məruzələrlə çıxış ediblər.

Dünya Gənc Türk Yazarlar Birliyi və Əziziyyə bələdiyyəsi tərəfindən təşkil olunan Azərbaycan şairlər və ozanlar gecəsi böyük uğurla baş tutub.