Diaspor

Ana səhifə

Diaspor

Dünya azərbaycanlıları Heydər Əliyevin xatirəsini yad ediblər

12 dekabr 2011 15:46 (UTC +04:00)

Bakı-APA. Dünyanın müxtəlif ölkələrində yaşayan azərbaycanlılar Heydər Əliyevin xatirəsini yad edib, onun xatirəsinə həsr olunmuş anım mərasimləri keçiriblər. Bu barədə APA-ya Diasporla İş üzrə Dövlət Komitəsinin mətbuat xidmətindən məlumat verilib. Məlumata görə, Rusiyanın Moskva, Sankt-Peterburq, Yekaterinburq və digər şəhərlərində Ümumrusiya Azərbaycan Konqresi, Heydər Əliyev Fondunun Rusiya nümayəndəliyi və Rusiyanın Azərbaycanlı Gənclər Təşkilatının təşkilatçılığı ilə anım mərasimləri, dəyirmi masa və konfranslar baş tutub. Bu tədbirlərdə Heydər Əliyevin keçdiyi həyat yolu barədə məlumat verilib, onun Azərbaycan xalqı və dövləti qarşısında göstərdiyi xidmətlərdən danışılıb. H. Əliyevin Ukrayna, Belarus, Estoniya, Litva, Latviya və Moldovada məskunlaşmış Azərbaycan diasporunun nümayəndələri də yad ediblər.
Ulu öndərin xatirəsinə həsr olunmuş anım mərasimləri Avropanın bir sıra ölkələrində, o cümlədən Almaniya, Fransa, İtaliyada, habelə Danimarka, İsveç, Niderland krallıqlarında, Polşa, Rumıniya, Macarıstan, Finlandiya, Çexiyada da keçirilib. Almaniyanın eyni zamanda üç şəhərində - Berlin, Drezden və Maqdeburq şəhərlərində tədbir və konfranslar təşkil olunub və dünya miqyaslı siyasətçi Heydər Əliyevin həyat və fəaliyyəti barədə məlumat verilib. Drezdendə Almaniya-Azərbaycan Dostluq Cəmiyyətinin təşkilatçılığı ilə baş tutmuş tədbirdə qurumun rəhbəri Ağahüseyn Babayev Azərbaycanın ən yeni tarixinin böyük bir hissəsinin məhz H. Əliyevin adı ilə bağlı olduğunu qeyd edib.
Maqdeburqda Almaniyanın Saxsen-Anhalt vilayəti üzrə Alman-Azərbaycan Mədəniyyət Cəmiyyətinin və Almaniyadakı Azərbaycan Diasporunun Mərkəzi Şurasının təşəbbüsü və Azərbaycanın Almaniyadakı səfirliyinin, Diasporla İş üzrə Dövlət Komitəsinin və Almaniyadakı Azərbaycanlıların Koordinasiya Mərkəzinin dəstəyi ilə keçirilən tədbirdə adı çəkilən təşkilatların nümayəndələri ilə yanaşı digər xalqların nümayəndələri də iştirak ediblər.
Heydər Əliyevin xatirəsinə həsr olunmuş anım mərasimi Türkiyənin paytaxtı Ankarada da keçirilib. 200-dək qonağın iştirak etdiyi anım tədbirində Azərbaycanın dövlət rəsmiləri, Milli Məclisin nümayəndələri ilə yanaşı Türkiyənin hökuməti və parlamentinin üzvləri, Azərbaycan diasporunun nümayəndələri, ictimai-siyasi xadimlər iştirak ediblər.

Birləşmiş Ərəb Əmirliklərində H. Əliyevin xatirəsinə həsr olunmuş simpozium keçirilib. BƏƏ-də fəaliyyət göstərən Azərbaycan Cəmiyyətinin təşkilatçılığı ilə Dubayda baş tutmuş tədbirdə ölkədə yaşayan azərbaycanlılar, hökumət nümayəndələri, türk, ərəb və digər xalqların diaspor təşkilatlarının təmsilçiləri iştirak ediblər.
Azərbaycanın ümummilli lideri Heydər Əliyevin xatirəsinə həsr olunmuş anım mərasimləri Gürcüstan, Özbəkistan, Qazaxıstan, Qırğızıstanda yaşayan azərbaycanlılar tərəfindən də keçirilib. Tədbirlərə azərbaycanlılarla yanaşı yerli ictimaiyyətin nümayəndələri, habelə ictimai-siyasi xadimlər də qatılıblar. İsraildə keçirilən konfransda Heydər Əliyev Azərbaycan dövlətinin memarı kimi səciyyələndirilib, Azərbaycanın bu gün qazandığı nailiyyətlərin Heydər Əliyev müdrikliyinin, onun apardığı siyasətin bəhrəsi olduğu fikri vurğulanıb.
H. Əliyevin xatirəsinə həsr olunmuş anım mərasimləri ABŞ, Kanada, Avstraliya və Yeni Zelandiyada da keçirilib, onun Azərbaycan dövləti qarşısında göstərdiyi xidmətlərin əvəzsiz olduğu qeyd olunub.

Heydər Əliyev _ Diaspora _ Anım