Diaspor

Ana səhifə

Diaspor

Sarayevoda Heydər Əliyev Fondunun təşəbbüsü ilə yenidən qurulan «Dostluq parkı» və Xocalı soyqırımı qurbanlarının xatirəsinə ucaldılmış abidə açılıb

25 fevral 2012 15:44 (UTC +04:00)

Bakı – APA. Bosniya və Herseqovinanın paytaxtı Sarayevo şəhərində Heydər Əliyev Fondunun təşəbbüsü ilə yenidən qurulan «Dostluq parkı»nın və Xocalı soyqırımı qurbanlarının xatirəsinə ucaldılmış abidənin açılışı olub. APA-nın məlumatına görə, açılış mərasimində Heydər Əliyev Fondunun vitse-prezidenti Leyla Əliyeva iştirak edib.

Əvvəlcə L.Əliyevanın Bosniya və Herseqovinanın Rəyasət Heyətinin üzvü Bakir İzetbeqoviç və qızı Yasmina İzetbeqoviç ilə görüşü olub. Görüşdə Sarayevoda «Dostluq parkı»nın açılışına görə təşəkkür bildirilib, bu tədbirin iki xalq arasında əlaqələrin genişləndirilməsinə xidmət etdiyi vurğulanıb.
Gələcək əməkdaşlığın müzakirə olunduğu görüşdə Heydər Əliyev Fondunun Bosniya və Herseqovinada həyata keçirdiyi humanitar layihələrin əhəmiyyəti xüsusi qeyd edilib.

Sonra Bosniya və Herseqovinanın rəsmi şəxsləri, ictimai-siyasi xadimləri, mədəniyyət işçiləri, ictimaiyyət nümayəndələrinin iştirakı ilə Sarayevoda yenidən qurulan «Dostluq parkı»nın açılışı olub.

Heydər Əliyev Fondunun vitse-prezidenti, «Xocalıya ədalət» kampaniyasının təşəbbüskarı L.Əliyeva Bosniya və Herseqovinada 1992-1995-ci illər müharibəsinin və 1992-ci ilin fevralında Azərbaycanın Xocalı şəhərində törədilmiş soyqırımı qurbanlarının xatirəsinə ucaldılmış abidə kompleksinin açılışında iştirak edib. Heykəltəraş Natiq Əliyevin müəllifi olduğu abidə iki dərdli ananın - yaşlı və cavan qadının obrazını əks etdirir. «Xocalıya ədalət» kampaniyası çərçivəsində Heydər Əliyev Fondunun təşəbbüsü, Azərbaycanın maliyyə dəstəyi, Sarayevonun Novi Qrad bələdiyyəsi və Azərbaycanın Bosniya və Herseqovinadakı diplomatik nümayəndəliyinin dəstəyi ilə reallaşan bu layihə Xocalı soyqırımının 20-ci ildönümü ərəfəsində faciənin əsl mahiyyəti ilə bağlı həqiqətlərin təbliğinə xidmət edən mühüm hadisədir.

Mərasimdə çıxış edən Bosniya və Herseqovinanın Rəyasət Heyətinin üzvü B.İzetbeqoviç xalqlarımızın tarixi münasibətlərindən danışıb. Hər iki ölkədə paytaxt şəhərlərinin adlarına küçələrin olduğunu diqqətə çatdıran B.İzetbeqoviç bildirib ki, L.Əliyevanın bu təşəbbüsü dostluq əlaqələrini daha da gücləndirəcək: «Bu abidə Azərbaycan ilə Bosniya və Herseqovinanın ağır günlərinin rəmzidir», - deyən B.İzetbeqoviç Heydər Əliyev Fondunun Bosniya və Herseqovinada gördüyü işləri yüksək qiymətləndirib və öz xalqı adından Azərbaycan prezidenti İlham Əliyevə təşəkkürünü bildirib.

Mərasimdə çıxış edən Heydər Əliyev Fondunun vitse-prezidenti L.Əliyeva Bosniya və Herseqovinanın rəhbərliyinə, o cümlədən Azərbaycan xalqının kədərini bölüşən bu ölkənin xalqına minnətdarlığını bildirib. L.Əliyeva 20 il əvvəl ermənilərin Xocalıda törətdikləri soyqırımı nəticəsində 613 dinc sakinin qətlə yetirildiyini diqqətə çatdırıb: «Xocalıda baş verənlərin ağrısı bu günədək hiss olunur. Əfsuslar olsun ki, bu, dünyanın digər hissələri üçün də acınacaqlı nəticələr verib. Azərbaycan coğrafi baxımdan Avropa ilə Asiya arasında yerləşir və insanlığa qarşı bu cinayət XX əsrin sonlarında, düz Avropanın kəndarında törədilib. Bu dəhşətli qətliam zamanı Xocalının 613 dinc sakini qətlə yetirilib».

«Heydər Əliyev Fondu və «Xocalıya ədalət» kampaniyası Xocalı həqiqətlərini dünya ictimaiyyətinə çatdırmağı qarşısına məqsəd qoyub, - deyən L.Əliyeva bildirib ki, hazırda bu kampaniya 50 ölkədə keçirilir və onun nəticəsi olaraq İslam Əməkdaşlıq Təşkilatının Parlament İttifaqı Xocalıda törədilmiş vəhşilikləri soyqırımı kimi tanıyıb. Bundan əlavə, Xocalı dəhşətləri Meksika və Pakistan parlamentləri tərəfindən də soyqırımı kimi qəbul olunub.

L.Əliyeva kampaniya çərçivəsində Xocalı soyqırımına dair kitab, buklet, disklərin hazırlandığını, dünyanın hər yerində müxtəlif tədbirlərin həyata keçirildiyini bildirib: «Bu gün etdiklərimizin heç biri Xocalı soyqırımının yaralarını sağalda bilməz. Bizim edə biləcəyimiz yalnız həmin dəhşətli tarixi yad etmək və qətliam zamanı öldürülən və ya ömürlük əlil olan uşaq, qadın və kişiləri unutmamaqdır».