Diaspor

Ana səhifə

Diaspor

Böyük Britaniyanın Ekzeter Universitetində Xocalı soyqırımının qurbanları yad edilib

25 fevral 2012 19:02 (UTC +04:00)

Bakı-APA. Böyük Britaniyanın nüfuzlu universitetlərindən olan Ekzeter Universitetində Ekzeter Azərbaycan Cəmiyyəti tərəfindən, respublikamızın İngiltərədəki səfirliyinin dəstəyi ilə Xocalı soyqırımının 20-ci ildönümünə həsr edilmiş tədbir keçirilib.
Ekzeter Azərbaycan Cəmiyyətindən APA-ya verilən xəbərə görə, tədbirin iştirakçıları arasında universitetin professorları və tələbələri, eyni zamanda ətraf şəhərlərdən gələn azərbaycanlı və əcnəbi qonaqlar olub.
Tədbirin açılışında çıxış edən Ekzeter Azərbaycan Cəmiyyətinin prezidenti Orxan Məmmədov iştirakçıları salamlayıb və Xocalı soyqırımının qurbanlarının xatirəsini bir dəqiqəlik sükutla yad edilib. Ardınca H.Əliyev Fondu tərəfindən hazırlanmış və Texas Azərbaycan-Amerika Şurası tərəfindən təqdim olunmuş erməni vəhşiliklərini əks etdirən qısa video nümayiş etdirilib.
Tədbir zamanı Britaniyanın Azərbaycandakı səfirliyinin nümayəndəsi Ceyhun Novruzov iştirakçılara “Xocalıya ədalət” kampaniyası ilə bağlı geniş məlumat verib və qonaqlar tərəfindən ünvanlanmış sualları cavablandırıb. Tədbirin sonunda Orxan Məmmədov faciənin dünyaya çatdırılmasının vacibliyini qeyd edərək iştirakçıları Böyük Britaniya hökumətinə ünvanlanmış elektron petisiyaya qoşulmağa dəvət edib. Sonra iştirakçılar müvafiq təbliğat materialları ilə tanış olub, kampaniyanın hazırladığı petisiyaya imza atıblar.
Ekzeter konfransı Böyük Britaniya sakinlərinə Xocalı soyqırımını daha yaxından tanıtmağa imkan yaradıb.
Qeyd edək ki, Ekzeter Azərbaycan Cəmiyyəti 2010-cu ilin noyabr ayında Orxan Məmmədovun təşəbbüsü ilə yaradılıb. Cəmiyyət Azərbaycanın, mədəniyyətimizin və tariximizin təbliği ilə əlaqədar bir sıra layihələrə həyata keçirib.