Diaspor

Ana səhifə

Diaspor

Marneulidə uşaq bağçalarının vəziyyəti müzakirə olunub - FOTO

Marneulidə uşaq bağçalarının vəziyyəti müzakirə olunub - <font color=red>FOTO</font>

11 may 2012 14:22 (UTC +04:00)

Marneuli. Nizami Məmmədzadə - APA. Gürcüstanın Marneuli şəhərindəki Demokratik Məşğulluq Mərkəzində (MDM) uşaq bağçalarının vəziyyəti müzakirə olunub. APA-nın Gürcüstan bürosunun məlumatına görə, tədbirdə Marneuli rayon İcra Hakimiyyətinin rəhbəri Zaza Dekonoidze, məktəbəqədər müəssisələrin direktoru Tofiq Hacıyev, “Qaranquş” Uşaq Mərkəzinin rəhbəri Zemfira Əzizbəyova, MDM-nin təmsilçisi Zaur Darğallı və başqaları çıxış ediblər.

Tədbirdə qeyd edilib ki, rayon büdcəsindən bağçalara ayrılmış 320 min lari çox azdır. Z. Dekonoidze iştirakçıların suallarını cavablandırarkən deyib ki, uşaq bağçaları üçün sentyabrın 1-dən büdcədən 1 milyon lari vəsait ayrılacaq. Bəzi natiqlər bildiriblər ki, azərbaycanlıların yaşadığı kəndlərdə yeni uşaq bağçalarının tikintisi üçün müvafiq torpaq sahəsi ayrılmalı və tikilən bağçalar Avropa standartlarına uyğun olmalıdır. Valideynlər və QHT nümayəndələri uşaqların bağçalara qəbul imkanlarının narazılıqlar yaratdığını və bağçalarda yer olmadığını söyləyiblər. QHT təmsilçiləri bağçalarda monitorinq keçirdiklərini və hazırkı şəraitin yarıtmaz olduğunu, təlim-tərbiyənin zəif aparıldığını nəzərə çatdırıblar.

Marneuli rayon İcra Hakimiyyətinin rəhbəri Zaza Dekonoidze APA-ya açıqlamasında gələn ildən başlayaraq Marneulidə yeni uşaq bağçalarının tikiləcəyini açıqlayıb: “Biz əvvəllər düşünürdük ki, kəndlərimizdə sosial vəziyyət yaxşılaşdırılmalı, yol, su problemi ilk növbədə həll edilməlidir. Amma sonra monitorinqlər nəticəsində belə qərara gəldik ki, ilk növbədə uşaq bağçalarına diqqət artırılmalıdır. Bu sahədə problemlərimiz çoxdur. Bunun üçün yeni maliyyə mənbələri axtarırıq. Müəllimlərin maaşlarını da artırmaq fikrindəyik. Bundan sonra yeni bağçalar tikmək istəyirik. Büdcədə o qədər də maliyyə vəsaitimiz yoxdur. Biz şirkətləri və iş adamlarını, beynəlxalq təşkilatları uşaq bağçaları ilə bağlı layihələr həyata keçirməyə çağırırıq. Şəxsi adamlara da imkan yaradırıq ki, kommersiya üsulu ilə uşaq bağçaları açsınlar və söz veririk ki, bu evlərin istilik sistemini təmənnasız olaraq biz quracağıq”.