Diaspor

Ana səhifə

Diaspor

Ukraynanın Nikolayev şəhərində azərbaycanlı uşaqlar üçün xüsusi sinif fəaliyyətə başlayıb - FOTOSESSİYA

Ukraynanın Nikolayev şəhərində azərbaycanlı uşaqlar üçün xüsusi sinif fəaliyyətə başlayıb - <font color=red>FOTOSESSİYA</font>

05 noyabr 2012 13:50 (UTC +04:00)

Bakı – APA. Ukraynanın mərkəzi şəhərlərindən olan Nikolayevdəki orta məktəblərin birində azərbaycanlı uşaqlar üçün Azərbaycan dilində xüsusi sinif fəaliyyətə başlayıb.

APA-nın məlumatına görə, şəhərin mərkəzindəki 42 saylı orta ümumtəhsil məktəbindəki xüsusi sinifdə məktəbin şagirdlərindən 25-dən yuxarı Ukrayna vətəndaşı olan azərbaycanlı uşaqlara həftə sonu iki gün Azərbaycanla bağlı fənlər tədris olunur.

Sinif Nikolayev vilayətindəki Heydər Əliyev Cəmiyyəti tərəfindən yaradılıb. Cəmiyyətin sədri Yunus Alıyev deyir ki, Azərbaycan dili və Azərbaycan tarixinin tədris olunduğu sinifdə dərslər həftənin xüsusi günləri – şənbə və bazar günləri keçirilir. Bu sinif üçün müəllimlər də Azərbaycandan gətirilib və bütün bunlara maddi dəstək Heydər Əliyev Cəmiyyəti tərəfindən göstərilir. Ümumilikdə 1000 nəfərdən çox şagirdi olan məktəbdə 42 azərbaycanlı uşaq oxuyur. Məktəbdə təşkil olunan Azərbaycan dilli sinifdə azərbaycanlı şagirdlərin xüsusi məşğələlərə qoşulması könüllüdür və ola bilsin ki, gələcəkdə sinifdəki uşaqların sayı daha da artsın: “Məqsədimiz yarım milyondan çox əhalisi olan Nikolayevdə yaşayan 17 minə yaxın Ukrayna vətəndaşı olan azərbaycanlılar arasında Azərbaycan dili və Azərbaycan tarixinin unudulmamasıdır. Buradakı azərbaycanlıların tam əksəriyyəti uzun illərdir burada yaşayır və onların ailələrində doğulan uşaqların çoxu Azərbaycanı görməyib. Bu səbəbdən hesab edirəm ki, məktəbdə təşkil olunan bu sinif buradakı biz azərbaycanlılar arasında Azərbaycançılıq irsinin yaşadılmasında yardımçı olacaq”.

Sinifdə Azərbaycan dili və tarixindən başqa milli adət-ənənələr, Azərbaycanın dahi şəxsiyyətləri barədə məlumatlar mütəmadi olaraq uşaqlara çatdırılır. Məktəbin qeyd olunan sinif yerləşən hissəsində Azərbaycanın tarixi, ədəbiyyatı və milli bayramları ilə bağlı fotoşəkillər, stendlər, o cümlədən Heydər Əliyevin fəaliyyətini əks etdirən fotostendlər yerləşdirilib. Nikolayevdəki Heydər Əliyev Cəmiyyəti 2010-cu ildə azərbaycanlı iş adamları Y.Alıyev, Anar Axundov və Kamran Həsənov tərəfindən yaranıb və ermənilərin də daha çox yaşadığı bu şəhərdə Azərbaycanla bağlı tədbirlərin keçirilməsində fəallıq göstərir. A.Axundov eyni zamanda Ukrayna dövləti tərəfindən yaradılan Azsaylı Xalqlar Birliyinin Nikolayev üzrə sədridir.

Heydər Əliyev Cəmiyyətinin sədri Y.Alıyev bildirib ki, yaxın zamanlarda şəhərin mərkəzi küçələrindən birinə “Azərbaycan” adının verilməsi üzərində çalışılır. Cəmiyyət Ukrayna Azərbaycanlıları Konqresi (UAK) ilə sıx əməkdaşlıq göstərir.

UAK sədri Rövşən Tağıyev deyib ki, Nikolayevdəkinə bənzər kiçik siniflər Ukraynanın Xarkov, Donetsk, Dnepropetrovsk, Kiyev və Simferopol şəhərlərində də fəaliyyətə başlayıb. UAK sədri təəssüflə qeyd edib ki, bəzi regionlarda azərbaycanlı valideynlər uşaqlarını həftəsonu bu siniflərə cəlb etməkdə passivlik göstərirlər: “Buna baxmayaraq, Ukraynanın digər azərbaycanlılar yaşayan bölgələrində də bu cür siniflər açılacaq. Dərs ləvazimatları da konqresin həmin şəhərlərdəki nümayəndələri tərəfindən Azərbaycandan gətirilərək təmin olunur. Məqsəd Ukrayna vətəndaşlığı olan Azərbaycan ailələrində doğulan uşaqların mütəmadi olaraq Azərbaycanla bağlı məlumatlandırılmasıdır”.