Diaspor

Diaspor

Litva Seymində “Vilnüs - Bakı: mədəniyyət körpüləri” adlı beynəlxalq elmi konfrans keçirilib

06 noyabr 2012 11:41 (UTC +04:00)

Bakı-APA. Litva parlamentində (Seymdə) “Vilnüs - Bakı: mədəniyyət körpüləri” adlı beynəlxalq elmi konfrans keçirilib. Azərbaycanın Litvadakı səfirliyindən APA-ya verilən məlumata görə, Litva azərbaycanlıları cəmiyyətinin təşəbbüsü ilə keçirilən konfrans Azərbaycanın dostu Vintsas Kreve-Mitskəviçiyusun anadan olmasının 130 illik yubileyinə həsr edilib.

Məşhur Litva yazıçısı və ictimai-siyasi xadimi Vintsas Kreve 1909-1920-ci illərdə Bakı 1-ci realnı məktəbinin müəllimi və 1919-1920-ci illərdə Litva dövlətinin Azərbaycan Demokratik Respublikasında ilk konsulu olub. V. Kreve həmin illərdə Bakıda Vikentiy İosifoviç Mitskeviç kimi tanınıb.

Litva Seyminin Administrasiyasının verdiyi xüsusi qərarla konfrans Seymin Konstitusiya zalında keçirilib. Konfrans proqramı çərçivəsində seymdə “V.Kreve-Mitskəviçyusun Azərbaycandakı həyat və fəaliyyəti barədə” sənəd və nəşrlərdən ibarət ekspozisiyanın, eləcə də “Litva-Azərbaycan ədəbiyyat körpüləri” adlı kitab sərgisinin açılışı olub. Azərbaycan ədəbiyyatından Litva dilinə və Litva ədəbiyyatından Azərbaycan dilinə tərcümə olunmuş və müxtəlif illərdə Vilnüsdə və Bakıda çap edilmiş kitablar xüsusi stendlərdə sərgilənib.

Tədbirin əvvəlində konfrans iştirakçılarına Azərbaycanın keçmişi, dövlətçilik tarixi, təbiəti, milli geyimləri və milli mətbəxi, memarlıq abidələri və dini məbədləri, xalçaları, musiqi alətləri və xalq rəqsləri haqqında, eləcə də ölkəmizin bugünki iqtisadiyyatı barədə qısametrajlı video görüntülər nümayiş etdirilib.

Səfir Həsən Məmmədzadə, seymin sədri İrena Dequtiene, Litvanın mədəniyyət naziri Arunas Qelunasın konfrans iştirakçılarına müraciətləri çatdırılıb.

Litva Milli Elmlər Akademiyasının prezidenti, akademik Valdemaras Razumas, Litva Milli Elmlər Akademiyasının həqiqi üzvü, Vilnüs universitetinin professoru Viktoriya Dauyotite-Pakeriene, Varena rayonu Vintsas Kreve adına Merkine gimnaziyasının müəllimi, tanınmış pedaqoji metodika mütəxəssisi Rita Çernyauskiene, Litva mədəniyyət nazirinin müşaviri, tarixçi və etnoloq alim, Qarabağ münaqişəsi mövzusunda elmi nəşrlər müəllifi İmantas Melyanas, V. Krevenin Vilnüsdəki memorial ev muzeyinin direktoru, tanınmış kreveşünas tədqiqatçı Vladas Turçinaviçyus, Litva Yazıçılar Birliyinin “Metai” (“Fəsillər”) ədəbiyyat jurnalının tənqid şöbəsinin müdiri, Vilnüs universiteti Litva ədəbiyyatı kafedrasının dosenti, filologiya elmləri doktoru Regimantas Tamoşaytis, Litva Seymi Sədrinin xarici siyasət məsələləri üzrə müşaviri, Vilnüs universiteti Beynəlxalq münasibətlər və siyasi elmlər institunun müəllimi, siyasi elmlər doktoru Laurinas Kasçyunas, Litva milli icmalar şurasının sədri, Azərbaycan-Litva ədəbi və mədəni əlaqələrinin tədqiqatçısı Mahir Həmzəyev məruzələrlə çıxış etdilər.

Konfrans Azərbaycan Respublikasının Diasporla İş üzrə Dövlət Komitəsinin dəstəyi ilə Litva azərbaycanlıları cəmiyyəti, Litva Respublikası Seyminin maarif, təhsil və mədəniyyət komitəsi, Litva Milli Elmlər Akademiyası və Litva milli icmalar evi tərəfindən təşkil olunub.

Litva