Diaspor

Diaspor

Professor Hayrettin İvgin: “Türk dövlətləri arasında mövcud əlaqələr istənilən səviyyədə deyil”

08 noyabr 2012 14:56 (UTC +04:00)

Bakı. Könül Kamilqızı - APA. “Bu gün türk dövlətləri arasındakı mövcud əlaqələr biz istədiyimiz səviyyədə deyil. Bəzi universitetlər və insanlar arasında müəyyən əlaqələr və işbirliyi olsa da, onlar müəyyən müddətli və keçici olur”. Bunu APA-ya açıqlamasında Türk Dünyası Araşdırmaları Beynəlxalq Elmlər Akademiyasının Ankara şəhərində başqanı, professor Hayrettin İvgin deyib.

O bildirib ki, iki dövlət arasında davamlı olan işbirliyi və layihələr olduqca azdır. Belə davamlı layihələrin daha da artmasını və yüksəlməsini istəyən H.İvgin bildirib ki, hazırkı əlaqələr arzu edilən deyil: “Bunun əsas səbəbi iki dövlətin hələ də bir-birini anlaya bilməməsidir. Xalq, vətəndaş olaraq bir-birimizi daha yaxşı anlasaq da, dövlət səviyyəsində bir az anlaşılmır. Hələ də bir-birimizi elmi, sənət, ədəbiyyat sahəsində isti qucaqlayacaq halda deyilik. Ancaq könüllərimiz hər zaman birlikdədir. Bu əngəlləri aradan qaldırmaq üçün universitetlər və elmi mərkəzlər arasında imzalanan protokolların sayının artırılması lazımdır. Əslində iki qardaş ölkə arasında protokol olmaz. Amma iki ayrı dövlət olduğu üçün bu protokolların olması gərəklidir”, - deyə o əlavə edib.

H.İvgin qeyd edib ki, hazırda Azərbaycan Atatürk Mərkəzi, Asiya Universiteti, Milli Elmlər Akademiyası və Gəncə Dövlət Universiteti ilə əlaqələr mövcuddur: “Biz istəyirik ki, bu fəaliyyətlər davamlı olsun”.