Gürcüstan. Nizami Məmmədzadə - APA. Gürcüstanda yaşayan azərbaycanlılar Heydər Əliyevin 90 illiyinə həsr olunan tədbirdə bəyanat qəbul ediblər. Azərbaycanlıların Mədəniyyət Mərkəzindən APA-nın Gürcüstan bürosuna verilən xəbərə görə, bəyanatda son günlər bəzi kütləvi informasiya vasitələrində Rusiyada yaradılmış “milyarderlər ittifaqı”nın üzvü Söyün Sadıqovun Gürcüstanın azərbaycanlı gəncləri ilə bağlı yaydığı məlumatın Gürcüstanda yaşayan azərbaycanlılar arasında təəssüf və narahatlıq doğurduğu bildirilib: “Gürcüstan azərbaycanlıları öz vətəninin tamhüquqlu vətəndaşı olaraq, dövlətin maddi və mənəvi dəstəyi ilə təhsil, mədəniyyət və s. sahələrdə cəmiyyətə qaynayıb-qarışmaqla ölkənin ictimai-siyasi həyatında daha fəal iştirak edirlər. Bu, tarixən dostluq və qardaşlıq telləri ilə üzvi şəkildə bir-biri ilə bağlanmış gürcü və Azərbaycan xalqlarının birgə yaşayışında və strateji əməkdaşlığında mühüm amildir. Belə bir məqam bəzi dairələrin məkrli siyasətinə uyğun gəlmir və onlar hər vəchlə buna mane olmağa çalışırlar”.
Bəyanatda Gürcüstanda yaşayan azərbaycanlıların həmişə Azərbaycan dövlətinin siyasətini dəstəklədikləri bildirilib: “Milli vətənimiz olan Azərbaycan Respublikasının artan nüfuzu, dünya birliyində sanballı söz sahibinə çevrilməsi biz gürcüstanlıları ürəkdən sevindirir və qürur hissi doğurur. Biz Azərbaycan Respublikasının prezidenti İlham Əliyevin yürütdüyü uğurlu daxili və xarici siyasəti dəstəkləyir, azərbaycançılıq ideyaları ətrafında sıx birləşir və heç zaman “düşmən dəyirmanına su tökülməsinə” imkan verməyəcəyimizi bildiririk”.
Qeyd edək ki, bəyanat Gürcüstan azərbaycanlılarının ziyalıları, parlamentin azərbaycanlı deputatları, gənclər və ictimaiyyət nümayəndələri tərəfindən yekdilliklə qəbul olunub.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
