Din

Ana səhifə

Din

Qamət Süleymanov: “Məscidin indiyə kimi bağlı qalmasının səbəbi bizə aydın deyil” - EKSKLÜZİV

Qamət Süleymanov: “Məscidin indiyə kimi bağlı qalmasının səbəbi bizə aydın deyil” - <font color=red>EKSKLÜZİV</font>

18 noyabr 2008 12:14 (UTC +04:00)

- Küveytə niyə getmişdiniz?

- Küveytə səfərimin məqsədi Məhəmməd Peyğəmbərin (s) müdafiəsi ilə bağlı keçirilən tədbirdə iştirak etmək idi. Lakin bəziləri bunu mənim ölkədən qaçmağım kimi qələmə verdi. Halbuki ölkədən qaçmağım üçün heç bir səbəb yoxdur. Mən öz işimi görürəm, məscid bağlı olsa da, fəaliyyətimi davam etdirirəm. Sadəcə, fəaliyyətimiz dağınıqdır. Əvvəllər isə hamı “Əbu Bəkr”ə toplaşırdı. Yəni məscidin bağlı qalmasından başqaları zərər çəkəcək. Allaha şükür etmək lazımdır ki, “Əbu Bəkr” məscidi var.

- Artıq üç aydır, məscid bağlıdır. Bu müddətdə özünüzü necə hiss edirsiniz?

- Sudan çıxarılmış balıq kimi. Mömin üçün məscid böyük rol oynayır. Məscid Allahın evidir, insan evində almadığı ləzzəti orada ibadət edəndə alır.

- Məscid bağlanandan sonra harada toplaşırsınız?

- Başqa məscidlərdə və ayrı-ayrı evlərdə...

- Bəs Sizə nə deyirlər? Məscid nə vaxt açılacaq?

- Biz də istintaqın davam etməsinin tərəfindəyik. Ancaq məscidin indiyə kimi bağlı qalmasının səbəbi bizə aydın deyil. Biz məhkəməyə müraciət etmişik. Sabah növbəti proses keçiriləcək. Gözləyirik ki, ədalətli qərar verəcəklər. Qanun tələb etdiyi qaydada axıra kimi mübarizə aparacağıq. Biz qanundan kənara çıxmaq fikrində deyilik.

- Məhkəmədə qarşı tərəf hansı arqumentlərlə çıxış edir?

- Məsələn, deyirlər ki, orada kiminsə qızına sataşırlar və ya azyaşlı uşaqlara avtomobil yudurdurlar. Lakin bunlar məscidin bağlanmasına səbəb ola bilməz. Bizə qarşı terror olub. Bu da bizim radikallığın əleyhinə çıxmağımızla bağlıdır. Radikal şəxslərin bəziləri əvvəllər bizim məsciddə namaz qılıb, sonra oranı tərk ediblər. Onların bir qrupu isə xaricdən gəlib.

- Kimdir onlar?

- Alimlər onlara təkfirçilər, cihad camaatı və digər adlar verir. Onların fikri cihad etməkdir. Azərbaycanda belə qüvvələr zəif də olsa, var. Belə şəxslərə ən güclü müqaviməti “Əbu Bəkr” məscidi göstərib. Biz bu baxımdan maarifləndirmə işi ilə məşğul oluruq. Belə bir vəziyyətdə məscidin bağlanması isə yalnız onlara xidmət edir. Radikalların əsas məqsədi elə “Əbu Bəkr”in bağlanması idi.

- Dini Qurumlarla İş üzrə Dövlət Komitəsindən Sizə nə cavab verirlər?

- Biz Dini Komitədən soyuqluq görürük. Biz indiyə kimi onlardan kömək gözləyirdik, lakin bu baş vermədi. Halbuki dini icmalara kömək göstərilməsi onların vəzifə borcudur.

- Dövlət Komitəsi bildirir ki, Sizin dini icmanın hüquqi ünvanı başqa yerdə ola-ola, Ülvi Bünyadzadə küçəsində fəaliyyət göstərməyiniz qanuna ziddir. Buna görə də məscidin açılmasını tələb etmək hüququnuz yoxdur...

- Heç icazə olmadan, qanunsuz bir quş yuvası da tikmək mümkün deyil. Necə olub ki, bu məscid şəhərin mərkəzində 10 il qanunsuz fəaliyyət göstərib. Bizim icma 1998-ci ildə yaradılıb və Ülvi Bünyadzadə küçəsində qeydiyyata düşüb. İcma məscid olmadan da fəaliyyət göstərə bilər. Həmin ərazidə məscidin təməli 1997-ci ildə qoyulub, 1 il sonra isə istifadəyə verilib. Elə 1998-ci ildən mən icmanın imamı kimi “Əbu Bəkr”də fəaliyyətə başlamışam. 2002-ci ildə Dini Qurumlarla İş üzrə Dövlət Komitəsi yaradılanda bütün icmaları yenidən qeydiyyata alındı. Həmin vaxt biz bütün sənədləri hazırlayıb təhvil verdik. Onda bizə dedilər ki, icmanın ünvanı hansısa bir ev göstərilməlidir. Mən də icmanın ünvanı kimi öz yaşadığım ərazini göstərdim. Yəni bütün icmalar kimi bizdən tələb olunan bütün sənədləri təqdim etdik. Həmin vaxt Dövlət Komitəsi bizdən Qafqaz Müsəlmanları İdarəsinin rəyini tələb etmədi. Komitənin sabiq sədri Rafiq Əliyev Şeyxin rəyini tələb etmədən bütün icmaları qeydiyyata aldı. Yəni burada bizlik heç bir problem yoxdur. Dövlət qurumu bizdən hansı sənədləri tələb edibsə, biz də təqdim etmişik. Məsciddə terror hadisəsi baş verməmişdən təxminən 2 ay əvvəl Dini Qurumlarla İş üzrə Dövlət Komitəsindən bizə zəng edib dedilər ki, onlar icmaları fəaliyyət göstərdiyi yerlərin hüquqi ünvan kimi qeydiyyata alınmasını istəyirlər. Biz də öz razılığımızı bildirdik. Lakin sonradan dedilər ki, bu məsələ hələlik qalsın.

- Şeyxülislam Hacı Allahşükür Paşazadənin sizin icmanın qeydiyyatı ilə bağlı fikirlərinə münasibətiniz necədir?

- Bizim Şeyxlə hər zaman normal münasibətlərimiz olub. Ona böyük hörmətimiz var. Biz istəyərdik ki, məscidin açılmasında Şeyx də öz köməyini göstərsin. O, nəyin ki, dövlətin daxilində, həm də xaricdə tanınmış nüfuz sahibidir.

- Sizin nə qədər tərəfdarınız var?

- Bu hesabat aparılmayıb. Ancaq biz gördük ki, baş verən hadisədən sonra camaatın çoxu bizi başa düşdü. Bizim haqqımızda düzgün olmayan çox informasiyalar yayılıb. Guya hansı ölkənin casuslarıyıq və haradansa pul alırıq.

- Doğrudan da indi cəmiyyətdə belə bir fikir var. Filankəs acından ölürdü getdi “Əbu Bəkr” məscidinə indi “Jeep” sürür. Maraqlıdır, insanlar gördüklərini danışmır?

- Ola bilər ki, kiminsə maliyyə vəziyyəti dəyişsin. Adamlar varlana bilər burada qeyri-adi heç nə yoxdur. Yəni bunlar məscidlə bağlı deyil. Orada heç kimə pul paylamırlar. Biz əlillərə və imkansız ailələrə yardımlar edirik. Bəzən bizim haqqımızda danışılanlara özümüz də gülürük. Heç vaxt nə dövlətə, nə də onun başçısına qarşı çıxmamışıq. XXI əsrin müsəlmanları ayrı cür düşünür. Bu gün dünyada radikallıq durmadan artır. Azərbaycan cəmiyyətində isə dini maarifləndirmə yoxdur. Bu işi biz görürük. Radikallığına görə kimisə tutub həbsxanaya salmaq məsələnin həlli deyil. Onlar içəridən daha radikal formada çıxırlar.

- Bütün cəmiyyət sizi vəhhabi kimi tanıyır. Siz isə iddia edirsiniz ki, vəhhabi deyilsiniz. Dediyiniz kimi gücünüz çoxdursa, niyə vəhhabi adını bu vaxta qədər öz üzərinizdən ata bilməyibsiniz?

- Biz əhli-sünnə, yəni sələflərik. Biz də onlardan soruşuruq ki, nəyə görə, bizə vəhhabi adı veriblər? Bəyəm qısa şalvar geyinmək və ya saqqal saxlamaq vəhhabilikdir? “Əbu Bəkr”ə gələnlərin çoxu saqqal saxlamırdı. Yəni bu cür geyinmək sadəcə dində buyurulan qaydalara riayət etməkdir. Bu cür fikirlər savadsızlıqdan yaranır. Adamlar tədricən hər şeyi biləcək.

- İcmanızın maliyyə mənbəyi haradır?

- Məscidə gələn adamlar. Bu o qədər də böyük məbləğ deyil. Həmin ərazidəki dükanlar da orada yaşayan insanlarındır. Sadəcə, bizə məscidə gələnlərə kirayə veriblər.

- Ailəniz də dindardır?

- Bəli, bütün ailə üzvlərimiz ibadət edir. İki az yaşılı oğlum var. Onların birinin adı Abdulla, digərinin adı isə Əlidir. Namaz qılanda oğlanlarım yanımda dayanır.

- Məsciddə partlayış baş verəndə yaralanmışdınız. İndi özünüzü necə hiss edirsiniz?

- Bədənimdə bir neçə qəlpə qalıb. İstəyirəm müalicəyə gedəm və həmin qəlpələri bədənimdən çıxardıram. İndi əsas işimiz “Əbu Bəkr”in açılmasıdır. Bilsək açılmayacaq öz işimizi bilərik. Məscidin bağlanmasını istəyən qüvvələr var. Ancaq hiss edirəm ki, məscid bağlanmayacaq.

- Deyirlər tərəfdarlarınızdan bəziləri həbs edilib.

- Mənim müavinlərimdən və yaxın tərəfdarlarımdan heç kim həbs edilməyib.