Din

Din

“Karvan-D” şirkətinin xətti ilə Həcc ziyarətinə gedən azərbaycanlı zəvvarlar Mədinədə ciddi problemlərlə üzləşiblər

27 noyabr 2008 17:09 (UTC +04:00)

Bakı. Hafiz Heydərov – APA. “Karvan-D” şirkətinin xətti ilə Həcc ziyarətinə gedən azərbaycanlı zəvvarlar Mədinədə ciddi problemlərlə üzləşiblər. Mədinə şəhərindən APA-ya telefon açan zəvvarlar bildiriblər ki, hazırda avtobusla həcc ziyarətinə gedənlərdən Mədinədə küçələrdə gecələmək məcburiyyəti ilə üzləşiblər. Onlar deyiblər ki, Həccə gedən 300-dən çox zəvvar otellə təmin olunmayıb, qida ala bilmir: “Mədinədə bizim üçün çox pis lap aşağı səviyyəli otaqlar ayırıblar. O da zəvvarların sayından qat-qat azdır. Buna görə də 10-15 nəfəri bir otaqda qalmağa dəvət edirlər. İndi burda pul toplayan zəvvarlar gecələmək üçün qaraj kirayələyirlər. Bəziləri isə özlərinə məscidlərin həyətində yer edirlər”.

Zəvvarlar deyiblər ki, ayrılmış otellər çirkli və natəmiz olduğundan, bir çox otaqlarda pəncərə və qapılar olmadığından, həm də bir neçə nəfərə bir otaq ayrıldığından dindarlar bu yerlərdən imtina edərək, küçədə, avtobusda və qarajlarda yatmağa üstünlük verirlər. Zəvvarlar bildiriblər ki, “Karvan D” şirkətinin qrupdakı rəhbəri olan Mirmehdi adlı şəxs narazılıqlara cavab olaraq indiki halda bundan artığının mümkün olmadığını deyib: “Şirkətin heç bir rəsmisi ilə əlaqə yarada bilmirik. Biz bu ziyarətə avtobusla gəlmək üçün 1950 manat pul ödəmişik. Amma burada böyük çətinliklə üzləşmişik. Çöllərdə ocaq qalayıb özümüz üçün yemək bişirir, küçələrdə yatırıq”.

Qafqaz Müsəlmanları İdarəsinin (QMİ) xarici əlaqələr şöbəsinin müdiri Müqəddəs Payızov APA-ya açıqlamasında azərbaycanlı zəvvarların Mədinədə problemlə üzləşmələri barədə onlarda heç bir məlumatın olmadığını bildirib. O, həmçinin bu il “Karvan D” şirkətinə Mədəniyyət və Turizm Nazirliyinin müraciəti əsasında kvota ayrıldığını bildirib: “Əgər şirkət haqqında zəvvarların şikayəti təsdiq olunarsa, gələn il həmin şirkətə kvota verilib-verilməməsi məsələsinə baxıla bilər”. QMİ-nin nümayəndəsi, həmçinin problemin ciddi araşdırılacağını da diqqətə çatdırıb.

“Karvan-D” şirkətinin icraçı direktoru Nurəddin Mehdiyev isə APA-ya açıqlamasında onların xətti ilə Həcc ziyarətinə gedən zəvvarların kütləvi şəkildə otel problemi ilə üzləşməsi barədə məlumatın həqiqəti əks etdirmədiyini bildirib: “Cəmi bir neçə zəvvar otelin şəraitini bəyənmir və buna görə narazılıqlarını bildirirlər”. N. Mehdiyev zəvvarların qida məhsulları ilə təmin olunmamasını da təkzib edib: “Zəvvarların Mədinədə yeməklə təmin olunması nəzərdə tutulmayıb. Biz onlara yalnız Məkkədə gündə iki dəfə yemək verəcəyimizi vəd etmişik. Məkkəyə çatsınlar, sözümüzə əməl edəcəyik”.