Din

Din

Qurban bayramının mahiyyəti və şərtləri barədə-ARAŞDIRMA

Qurban bayramının mahiyyəti və şərtləri barədə-<font color=red>ARAŞDIRMA </font>

06 dekabr 2008 09:18 (UTC +04:00)

Bakı. Elbrus Seyfullayev-APA. “Qurban kəsmək dünyanın bütün müsəlmanları üçün müstəhəb, Məkkədə Həcc ziyarətində olan Hacılar üçün isə vacibdir”. Bunu APA-ya açıqlamasında Qafqaz Müsəlmanları İdarəsinin Elm və təhsil şöbəsinin müdiri Hacı Mirəziz Seyidzadə deyib. Hacının sözlərinə görə, Qurban kəsilməsi İbrahim peyğəmbərdən sonra vacib buyurulub. Rəvayətə görə, İbrahim peyğəmbər Allaha sevgisini göstərmək üçün oğlu İsmayılı Mina dağında qurban kəsməyə razı olur. İsmayılın başını kəsmək üçün bıçağı boğazına dirəsə də, bıçaq kəsmir və Allahın onun qurbanını qəbul etdiyi haqda səda gəlir, Allah bir qoç nazil edir. İbrahim peyğəmbər qoçu oğlu İsmayılın yerinə kəsir. Bununla da müsəlmanların Qurban kəsməsi ilə bağlı ənənənin əsası qoyulur.

M. Seyidzadə Qurban bayramının İslam aləminin ən möhtəşəm bayramlardan biri olduğunu deyib. Onun sözlərinə görə, bu bayram bütün müsəlman aləmində hər il Ramazan ayı bitəndən 70 gün sonra qeyd olunur və adətən üç gün davam edir. Mərasimlərdə qoyun, qoç, inək, dana və dəvə kəsilir: “ Qurbanın bir hissəsi kasıblara paylanır. Hamıya bərabər pay verilir, qurban kəsən özü də bərabər pay götürə bilər. Ənənəyə görə, dilənçi və kasıblar bayram günü ac qalmasınlar deyə bu gün mərasimlərə dəvət olunurlar. Fağır və kasıb adamlar sevinir”.

Qafqaz Müsəlmanları İdarəsindən APA-ya bildirilib ki, İsmayıl qurbanı bayram qeyd olunan üç günün birində gündüz vaxtı kəsilə bilər. Qaydaya görə, bayramda hər adamın bir qoyun kəsməsi məqsədəuyğun hesab olunur. İri buynuzlu heyvan kəsiləndə 7, dəvə kəsiləndə isə 12 adam birləşə bilər.

Din xadimləri onu da deyiblər ki, “pulla qurban payı almaq” kimi bir anlayış yoxdu: “Kimsə qurban günü pulla bir neçə kilo ət alırsa, bu qurban payı hesab olunmur”.

Xatırladaq ki, Azərbaycanda daha çox qoç qurbanlıq kimi istifadə olunur. Hazırda qara bazarda bir qoçun orta qiyməti çəkisindən asılı olaraq, 100-150 manat təşkil edir.

Qeyd edək ki, bu il Qurban bayramı Azərbaycanda dekabrın 8 və 9-da qeyd olunacaq. Məkkədə olan zəvvarlar bu il dekabrın 8-də qurban kəsəcəklər.

Azərbaycan məscidlərində bayram namazı dekabrın 8-də saat 09.00 radələrində qılınacaq.