Din

Ana səhifə

Din

Bu il ərzində cənub bölgəsində 1300 nüsxə qadağan olunmuş dini ədəbiyyat aşkar edilərək götürülüb

11 dekabr 2008 07:40 (UTC +04:00)

Masallı. Ağəddin Babayev – APA. “Azərbaycanın uzun illər keçmiş SSRİ-nin tərkibində olması dini dəyərlərimizə və ruhanilərin mükəmməl təhsil almasına ciddi zərbə vurub. Bu təsirləri aradan qaldırmaq üçün müəyyən işlər görülsə də, problemlər yaşanmaqdadır. Ruhanilərin savad məsələsində bu problem özünü daha qabarıq büruzə verir”.
Bu sözləri APA-nın cənub bürosuna Dini Qurumlarla İş üzrə Dövlət Komitəsinin (DQİDK) cənub bölgəsi üzrə şöbə müdiri Miryəhya Bədirov deyib. M. Bədirovun sözlərinə görə, şöbənin əhatə etdiyi 13 rayonda 700-ə yaxın ruhani fəaliyyət göstərsə də, onlardan yalnız 250 nəfərinin dini təhsili var. Komitə təmsilçisi deyib ki, Qafqaz Müsəlmanları İdarəsinin (QMİ) müvafiq sərəncamına əsasən dini fəaliyyətlə məşğul olan bütün mollalar QMİ-nin Elmi-Dini Şurasında attestasiyadan keçməlidir və yalnız bundan sonra onların din sahəsində çalışmalarına icazə verilə bilər: “Amma təəssüf ki, cənub bölgəsindən idarədən dini fəaliyyət üçün xüsusi icazə vərəqələrini alanların sayı azlıq təşkil edir”.
Bu il ərzində bölgə üzrə 16 adda 1300 nüsxə DQİDK tərəfindən yayılması qadağan edilən zərərli dini ədəbiyyatın aşkar edilərək götürüldüyünü diqqətə çatdıran M. Bədirov əhalinin müxtəlif dini sekta və cərəyanların təsirinə düşməməsi məqsədilə yerlərdə mütəmadi olaraq maarifləndirmə işlərinin, o cümlədən seminar-treninqlərin keçirildiyini bildirib. Hazırda respublika üzrə qeydiyyata alınan 500-dən artıq dini icmadan təkcə 130-nun cənub bölgəsində fəaliyyət göstərdiyini vurğulayan şöbə müdiri bu sahədə işlərin davamlı olacağını qeyd edib.