Din

Ana səhifə

Din

Qafqaz Müsəlmanları İdarəsinin Qazılar Şurası fətva verib

23 dekabr 2008 10:33 (UTC +04:00)

APA-nın xəbərinə görə, Qazılar Şurasının bu gün keçirilən toplantısında elan olunan fətvada bildirilir ki, bu il Məhərrəmlik ayı dekabrın 29-da başlanır və Hicri-Qəməri təqviminin ən müqəddəs aylarından biridir. Bu ayın İslam tarixində döyüşlərin qadağan edildiyi, həm də Aşura günündə İmam Hüseynin və Əhli-Beyt tərəfdarlarının şəhadətə yetişdiyi ay kimi tarixə düşdüyü də fətvada əksini tapıb.

Aşura günü isə yanvarın 7-nə təsadüf edir və həmin gün Kərbəla şəhidləri ilə yanaşı, Azərbaycanın müstəqilliyi uğrunda mübarizədə şəhid olanlar da yad olunacaq. Son illər Qafqaz Müsəlmanları İdarəsinin təşəbbüsü ilə Məhərrəmlik ayında qanvermə aksiyasının keçirildiyi, bunun təqdir olunduğu da fətvada qeyd olunub.

Fətva veriləndən sonra toplantıda çıxış edən QMİ sədri Şeyxülislam Allahşükür Paşazadə Azərbaycanda dini azadlığın olduğunu bildirməklə yanaşı, Aşura günü bəzi şəxslərin qanundankənar hərəkətlərə yol verdiklərini diqqətə çatdırıb.QMİ sədri deyib ki, İmam Hüseyn şəhidliyini düzgün anlamaq lazımdır: “Bəziləri Aşura günü küçələrə çıxıb aksiyalar keçirir, qanundankənar hərəkətlər edirlər. Zəncir vurmaq, baş yarmaq, soyunub bədəni göstərmək düzgün hərəkətlər deyil”.

Şeyxülislam qeyd edib ki, axundlar bununla bağlı vətəndaşları maarifləndirməlidirlər.

Dini Qurumlarla İş üzrə Dövlət Komitəsinin sədri Hidayət Orucov da Məhərrəmlik ayının yüksək səviyyədə, mədəniyyət tədbiri kimi keçirilməsinin vacibliyini vurğulayıb. Komitə sədri deyib ki, bu ayda müəyyən qrupların maraqlarına uyğun addımların atılmasına yol vermək olmaz.

məhərrəmlik_Azərbaycan