Din

Ana səhifə

Din

Dini Qurumlarla İş üzrə Dövlət Komitəsinin sabiq sədri: “Azərbaycanda radikal vəhhabilik problemi var”

24 dekabr 2008 14:11 (UTC +04:00)

Bakı. Elbrus Seyfullayev - APA. ““Əbu Bəkr” məscidi ətrafında yaranmış problemə görə səhvi özümüzdə axtarmaq lazımdır. O dövrdə məscidin tikilməsinə və ona xarici vətəndaşların rəhbərlik etməsinə fikir verilməyib. Həmin vaxt
Dini Qurumlarla İş üzrə Dövlət Komitəsi olmayıb. Onlar isə bu boşluqdan istifadə ediblər”. Bu sözləri APA-ya açıqlamasında Dini Qurumlarla İş üzrə Dövlət Komitəsinin sabiq sədri Rafiq Əliyev deyib. R. Əliyev bildirib ki, onun adı “Əbu Bəkr” məscidi ilə bağlı məsələdə heç vaxt hallandırıla bilməz: “Bu, çox təhrikedici söhbətdir. “Əbu Bəkr” məscidi 1997-ci ildə tikilib və qeydiyyatdan keçib. Həmin vaxt məscid xarici təşkilatın adına olub. Biz isə məscidi dövlətin balansına almışıq”.

“Əbu Bəkr” məscidinin cəmiyyətdə müəyyən təhlükə yaratmasına gəlincə, R. Əliyev ibadət ocağını heç vaxt təhlükə mənbəyi kimi görmədiyini deyib: “Təhlükə insanların özündədir. Azərbaycanda radikal vəhhabilik problemi var. Bunu mən həmişə demişəm. Ancaq bir məsciddə toplaşan insanların hamısını radikal adlandırmaq olmaz”.

Azərbaycandakı dini durumda müəyyən irəliləyişlərin olduğunu bildirən R. Əliyev dövlət inkişaf etdikcə və siyasət düzgün seçildikcə, bu sahədə olan problemlərin öz-özünə həll ediləcəyini deyib: “Bu gün Azərbaycan qüdrətli dövlətə çevrilir. Beynəlxalq təşkilatların Azərbaycandakı dini durumla bağlı hesabatlarının böyük əksəriyyəti isə böhtan xarakterli və qərəzlidir”.

Hazırda “İrşad” İslam Araşdırmalar Mərkəzinə rəhbərlik etdiyini deyən sabiq komitə sədri bir müddət əvvəl “Ərəbcə-Azərbaycanca lüğət” tərtib etdiyini bildirib: “Hesab edirəm ki, dövlət komitəsinin sədri olanda müəyyən müddətə ezamiyyətə göndərilmişdim. İndi öz yerimə qayıtmışam”.

“Əbu_Bəkr”