Din

Ana səhifə

Din

Azərbaycan prezidenti, dövlət və hökumət rəsmiləri general Rail Rzayevin öldürülməsi ilə bağlı başsağlığı veriblər

11 fevral 2009 17:01 (UTC +04:00)

APA-nın məlumatına görə, başsağlığında bildirilir ki, Azərbaycan Silahlı Qüvvələrinə ağır itki üz verib: “Azərbaycan Respublikası Müdafiə Nazirliyi Hərbi Hava Qüvvələri və Hava Hücumundan Müdafiə Qoşunlarının komandanı, müdafiə nazirinin müavini, general-leytenant Rail Qurban oğlu Rzayev 2009-cu il fevral ayının 11-də ömrünün 64-cü ilində faciəli surətdə həlak olub.

Rail Rzayev 1945-ci il martın 10-da Bakı şəhərində anadan olub. 1962-ci ildə Sumqayıt şəhərindəki 6 nömrəli orta məktəbi bitirdikdən sonra SSRİ Hava Hücumundan Müdafiə Qoşunlarının Orcenikidze radiotexnika məktəbində təhsil almağa başlayıb. R. Rzayev 1966-cı ildə həmin məktəbi bitirərək, həqiqi hərbi xidmətini davam etdirmək üçün Hava Hücumundan Müdafiə Qoşunlarının Bakı Hərbi Dairəsinə göndərilib. O, burada baş texnik, daha sonralar isə hərbi hissədə batareya komandirinin müavini və divizion komandirinin silahlanma üzrə müavini vəzifələrində xidmət edib.

1975-ci ildə Rail Rzayev keçmiş SSRİ-nin marşal Georgi Jukov adına Hava Hücumundan Müdafiə Hərbi Akademiyasına daxil olub. Akademiyanı bitirdikdən sonra “N” hərbi hissədə divizion komandiri vəzifəsində xidmətə başlayıb. 1980-1992-ci illərdə müxtəlif hərbi hissələrdə hərbi hissə komandirinin müavini, hərbi hissə komandiri vəzifələrində çalışıb. Keçmiş sovet silahlı qüvvələrində ştatların ixtisarına görə ordu sıralarından ehtiyata buraxılıb.

1992-ci ildən etibarən R. Rzayev Azərbaycan Silahlı Qüvvələrində fəaliyyət göstərməyə başlayıb. O, Müdafiə Nazirliyi Hərbi Hava Qüvvələrinin və Hava Hücumundan Müdafiə Qoşunlarının komandanı – idarə rəisi vəzifəsinə təyin olunub. R. Rzayev Azərbaycan prezidentinin sərəncamı ilə 1993-cü ildə Azərbaycan müdafiə nazirinin müavini - Hərbi Hava Qüvvələri və Hava Hücumundan Müdafiə Qoşunlarının komandanı vəzifəsinə təyin edilib və ömrünün sonunadək bu vəzifədə xidmət edib.

R. Rzayev 1994-cü ildə general-mayor, 2002-ci ildə isə general-leytenant hərbi rütbələrini alıb. Tutduğu vəzifələrdən asılı olmayaraq, o özünü daim səriştəli və bacarıqlı hərbçi, yüksək peşəkarlığa və təşkilatçılıq qabiliyyətinə malik təcrübəli komandir kimi tanıdıb. Müstəqil Azərbaycan Hərbi Hava Qüvvələri və Hava Hücumundan Müdafiə Qoşunlarının yaradılması və formalaşdırılmasında böyük əməyi olub.

R. Rzayevin Vətən qarşısında xidmətləri yüksək qiymətləndirilib. O, bir sıra orden və medallara layiq görülüb, o cümlədən Azərbaycanın müstəqilliyinin və ərazi bütövlüyünün qorunub saxlanılmasında xüsusi xidmətlərinə görə “Azərbaycan Bayrağı” ordeni ilə təltif edilib.

General-leytenant Rail Qurban oğlu Rzayevin əziz xatirəsi onu tanıyanların qəlbində həmişə yaşayacaqdır.
Allah rəhmət eləsin!”

Başsağlığı prezident İlham Əliyev, baş nazir Artur Rasizadə, Milli Məclisin sədri Oqtay Əsədov, Prezidentin İcra Aparatının rəhbəri Ramiz Mehdiyev, Bakı Şəhər İcra Hakimiyyətinin başçısı Hacıbala Abutalıbov, müdafiə naziri Səfər Əbiyev, daxili işlər naziri Ramil Usubov, milli təhlükəsizlik naziri Eldar Mahmudov, fövqəladə hallar naziri Kəmaləddin Heydərov, Dövlət Sərhəd Xidmətinin rəisi Elçin Quliyev, Azərbaycan Respublikasının hərbi komissarı Əliağa Hüseynov, Azərbaycan Silahlı Qüvvələrinin baş qərargah rəisi Nəcməddin Sadıqov, Prezidentin təhlükəsizlik və müdafiə məsələləri üzrə müşaviri Vahid Əliyev və digər rəsmi şəxslərin adından yayılıb.

Rail_Rzayev