Din

Ana səhifə

Din

Azərbaycandakı dini konfessiyaların təmsilçiləri radikal və ekstremist qruplara qarşı mübarizənin daha da gücləndirilməsini zəruri hesab edir

17 mart 2009 13:27 (UTC +04:00)

Bakı. Elbrus Seyfullayev - APA. Dini Qurumlarla İş üzrə Dövlət Komitəsi sədrinin yanında Məşvərət Şurasının iclası keçirilib. Komitədən APA-ya verilən məlumata görə, iclasda dini maarifçilik işinin genişləndirilməsi, 31 mart - Azərbaycanlıların Soyqırımı və 21 Aprel - Xolokost günləri, 9 Aprel - Pesax, 19 Aprel - Pasxa Bayramı, “Təzəpir” məscidinin və Bakı İslam Universitetinin yeni binasının açılış mərasiminə, eləcə də Rus-Pravoslav Kilsəsinin Bakı və Xəzəryanı Yeparxiyasının fəaliyyətinin bərpa olunmasının on illiyi münasibətilə keçiriləcək tədbirlərə hazırlıq və cari məsələlər müzakirə olunub.

Məşvərət Şurasının üzvləri respublikada dini durumun sabit olduğunu qeyd edərək, Azərbaycan dövlətinin din siyasətinin müsbət nəticələr verdiyini vurğulayıblar. İclasda çıxış edən Qafqaz Müsəlmanları İdarəsinin sədr müavinləri Salman Musayev, Sabir Həsənli, Rus Pravoslav Kilsəsinin Bakı və Xəzəryanı Yeparxiyasının yepiskopu Aleksandr İşein, Avropa Yəhudilərinin Bakı dini icmasının sədri Gennadi Zelmanoviç, Roma Katolik kilsəsinin Azərbaycandakı ordinatoru Yan Çapla, Bakı şəhəri Dağ Yəhudiləri dini icmasının nümayəndəsi Semyon Şalmeyev radikal və ekstremist ruhlu qruplara qarşı mübarizənin daha da gücləndirilməsinin zəruri olduğunu bildiriblər.

Qeyd olunub ki, cəmiyyətdə zərərli dini meyllərin, qanunsuz nəşr olunan ədəbiyyatların və CD formatında dini mətnlərin yayılmasında müəyyən maraqlı qüvvələr var. Şura üzvləri müzakirə olunan məsələlərlə bağlı tövsiyələr verib.