Din

Ana səhifə

Din

Hidayət Orucov: ““Peyğəmbərimiz Məhəmmədin Məscidi” qanunsuz tikildiyinə görə sökülüb”

27 aprel 2009 10:20 (UTC +04:00)

APA-nın məlumatına görə, söküntü işlərinə aprelin 24-də Yasamal rayon İcra Hakimiyyətinin nümayəndələrinin iştirakı və polis əməkdaşlarının nəzarəti altında başlanılıb. Hazırda məscidin minarəsi sökülür.

Yasamal rayon Dini İcmasının sədri Mirvaleh Mövsümov APA-ya deyib ki, söküntü məhkəmənin qərarı olmadan aparılır: “Bu isə həm yerli qanunvericiliyə, həm də beynəlxalq normalara ziddir. Məscidin sökülməsi ilə bağlı Yasamal rayon Məhkəməsinin 28 noyabr 2008-ci il tarixli qətnaməsinin ləğv edilməsinə dair apellyasiya şikayəti verilib. Hazırda iş Bakı Apellyasiya Məhkəməsindədir və hər hansı qərar qəbul olunmayıb. Yəni məscid məhkəmənin qərarı olmadan sökülüb”.

Məsələ ilə bağlı isə Yasamal rayon İcra Hakimiyyətinin mövqeyini öyrənmək mümkün olmayıb.

Dini Qurumlarla İş üzrə Dövlət Komitəsinin sədri Hidayət Orucov isə APA-ya açıqlamasında bildirib ki, “Peyğəmbərimiz Məhəmmədin Məscidi” qanunsuz tikilib, bununla bağlı keçirilən bütün məhkəmə instansiyalarında da ibadət ocağının qanunsuz inşa edildiyi təsdiqini tapıb. Komitə sədrinin sözlərinə görə, sözügedən məscid qanunsuz tikilməklə yanaşı, həmin ərazidə yerləşən İqtisad Universitetinin də həyətinin bir hissəsi zəbt olunub: “Bundan başqa, məscid tikilərkən arxitektura qaydalarına riayət olunmayıb”.

H. Orucov məscidin sökülməsinin tolerantlığa zərbə kimi qiymətləndirilməsinin də yanlış olduğunu söyləyib: “Qanunsuz tikilmiş məscidin sökülməsi qətiyyən Azərbaycandakı tolerantlığa zərbə kimi qiymətləndirilə bilməz. Bu ölkədə heç kəs dini etiqadına görə təqib olunmur”.

Qeyd edək ki, Yasamal rayon Məhkəməsinin 28 noyabr 2008-ci il tarixli qətnaməsi ilə Yasamal rayon İcra Hakimiyyətinin qeyri-qanuni tikilinin sökülməsinə dair iddiası təmin olunub. Qətnamə onunla əsaslandırılıb ki, qeyd edilən ünvanda təyinatı məlum olmayan qeyri-yaşayış sahəsi tikilib və buna görə də iddia təmin olunaraq, həmin qeyri-yaşayış sahəsi - məscid sökülməlidir. Hazırda iş Bakı Apellyasiya Məhkəməsindədir.

“Peyğəmbərimiz_Məhəmmədin_Məscidi”