Din

Ana səhifə

Din

Şeyxülislam Hacı Allahşükür Paşazadə: “Biz, din xadimləri Dağlıq Qarabağ münaqişəsinin sülh yolu ilə həll olunmasını istəyirik”

18 iyun 2009 15:46 (UTC +04:00)

Moskva. R. Mətləboğlu-APA. “Dağlıq Qarabağ münaqişəsi çox mühüm və Azərbaycan xalqı üçün həyati əhəmiyyət daşıyan məsələdir. Dağlıq Qarabağ məsələsi – bizim ağrımızdır. Biz, din xadimləri, istəyirik ki, Qarabağ problemi sülh yolu ilə həll olunsun, çünki Qarabağ və ona bitişik rayonlardan milyonlarla azərbaycanlı zorla öz yurd-yuvalarından zorla qovulub, Azərbaycan torpaqlarının 20 faizi isə Ermənistanın işğalı altındadır”. Bu fikirləri Rusiya paytaxtında keçiriləcək “MDB müsəlmanları konfessiyalararası və millətlərarası barışığa tərəfdardır” beynəlxalq elmi-praktik konfransdan bir gün əvvəl keçirilən mətbuat konfransında APA-nın Moskvadakı müxbirinin sualını cavablandıran Qafqaz Müsəlmanları İdarəsinin sədri, Şeyxülislam Hacı Allahşükür Paşazadə söyləyib.

QMİ sədri bildirib ki, təkcə Dağlıq Qarabağ münaqişəsinin deyil, MDB məkanında mövcud olan digər münaqişələrin də dini xarakter almamasına, islam və xristian dinləri arasında qarşıdurma görüntüsü yaratmamasına çalışır və ümid bəsləyirlər: “Biz bunun üçün mümkün olan hər şeyi edir və bunu özümüzün birinci vəzifəsi sayırıq. Dövlət müxtəlif konfessiyaların rəhbərləri, o cümlədən erməni katalikosu ilə görüşmək üçün hər cür şərait yaradır. Dağlıq Qarabağ münaqişəsinin sülh yolu ilə həllinə dair mənim və erməni katalikosunun mövqeyi üst-üstə düşür, bunu dəfələrlə verdiyimiz birgə bəyanatlar da təsdiqləyir. Əgər dövlət xadimləri gərginlik ocaqlarını yatırmaq üçün din xadimlərinin köməyinə ehtiyac duyarlarsa, biz həmişə kömək etməyə hazırıq, lakin din xadimlərinin heç zaman siyasi məsələlərə qarışmaq arzusu olmayıb. Çünki siyasət dövlətin səlahiyyəti daxilində olan məsələdir”.

Moskvada keçirilən MDB ölkələrinin müsəlman liderlərinin konfransının nəticələrini dəyərləndirən Allahşükür Paşazadə bildirib ki, bu konfrans son 18 ildə postsovet məkanının müsəlman dini liderlərinin ilk görüşüdür. Onun sözlərinə görə, MDB ölkələri müsəlmanlarının konfessiyalararası münasibətlər tarixində yeni mərhələ açan bu konfransa 17 dövlətdən 200-dək nümayəndə qatılıb. İştirakçılar arasında MDB ölkələrinin müsəlman dini liderləri, müxtəlif konfessiyaları təmsil edən din xadimləri, diplomatik missiyaların nümayəndələri, görkəmli ictimaiyyət nümayəndələri olub. QMİ sədri konfransın mühüm nəticələrindən biri kimi Məşvərət Şurasının yaradılmasını qeyd edib.