Din

Ana səhifə

Din

Şeyxülislam: “Qarabağa getməklə bağlı təklif olsa, müsbət yanaşacağam”

14 iyul 2009 11:45 (UTC +04:00)

Bakı. Elbrus Seyfullayev – APA. “Mənim Qarabağla bağlı yalnız bir prinsipim var. Bu da Azərbaycanın işğal altında olan torpaqlarının geri qaytarılmasıdır. Münaqişənin sülh yolu ilə həll edilməsinin tərəfdarıyam”. APA-nın məlumatına görə, bu sözləri Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə bildirib.
Dağlıq Qarabağa təşkil olunan səfərlərə münasibət bildirən A. Paşazadə ona belə bir təklif olarsa, müsbət yanaşacağını söyləyib: “Hələlik mənə Qarabağa getməklə bağlı təklif olmayıb. Ancaq mən bu səfərlərə pis baxmıram. Biz öz torpağımıza gedirik. Qarabağ bizimdir, başqasının deyil. Hesab edirəm ki, belə səfərlərin ancaq xeyri ola bilər. Mən hər vasitəyə əl atmağın tərəfdarıyam, təki içində Qarabağı qaytarmaq olsun”.
QMİ sədri hələ 1988-ci ildən başlayaraq Ermənistan katolikosu ilə görüşlər keçirdiyini xatırladıb: “Bizim görüşlərdə hətta müəyyən sənədlər də imzalanıb. Gələcəkdə belə təkliflər olarsa, baxacağıq. Ola bilər, bu yaxınlarda Rusiya patriarxı bizim növbəti görüşümüzü təşkil etsin. Gələn ilin aprelində Bakıda MDB Dinlərarası Məşvərət Şurasının toplantısı keçiriləcək. Mənim adımdan Ermənistan katolikosu Qareginə də dəvət göndəriləcək. Əgər o istəyəcəksə, gəlib iştirak edə bilər”.
A. Paşazadə həmçinin iyulun 21-də Moskvaya səfər edəcəyini deyib: “Orada UNESCO yanında Dini Məşvərət Şurası təsis ediləcək. Həmin toplantıda dünyanın yüksək titullu dini liderləri iştirak edəcək. Həmin yaradılacaq qurumda müsəlman dünyasını Səudiyyə Ərəbistanı Krallığı, İordaniya və Azərbaycan təmsil edəcək. Azərbaycanın bu qurumda öz nümayəndəliyi olacaq. Ümumiyyətlə, bu qurum mədəni, dini məsələlərlə bağlı məsləhətlər verəcək”.
QMİ sədri Moskva keçiriləcək toplantı iştirakçılarının Rusiya dövlətinin rəhbərliyi ilə də görüşünün planlaşdırıldığını bildirib.

Dağlıq Qarabağ