Din

Ana səhifə

Din

Moskvada UNESCO yanında Dini Liderlərin Məşvərətçi Qrupunun təsis yığıncağı keçirilib- FOTOSESSİYA

Moskvada UNESCO yanında Dini Liderlərin Məşvərətçi Qrupunun təsis yığıncağı keçirilib- <font color=red>FOTOSESSİYA</font>

22 iyul 2009 10:54 (UTC +04:00)

APA-nın Moskva müxbirinin məlumatına görə, toplantıda UNESCO-nun baş direktoru Koisiro Matsuura, Moskva və Ümumrusiya Patriarxı Kirill, Qafqaz Müsəlmanları İdarəsinin sədri Şeyxülislam Hacı Allahşükür Paşazadə, həmçinin Vatikan, ABŞ, Səudiyyə Ərəbistanı, Almaniyadan, habelə digər ölkə və beynəlxalq təşkilatlardan nümayəndələr iştirak edib. Yığıncağa Rusiya xarici işlər nazirinin müavini Aleksandr Yakovenko da qatılıb.

Toplantını açıq elan edən Rus Pravoslav Kilsəsinin başçısı, Moskva və Ümumrusiya Patriarxı Kirill bildirib ki, yeni qurum dini liderlərin UNESCO-nun həyata keçirdiyi yüksək missiyaya kömək etməsi məqsədilə yaradılır: “Bu gün beynəlxalq münasibətlərdə dini faktorun rolu getdikcə artır. Bununla yanaşı, müəyyən radikal dini qüvvələr din faktorundan istifadə edərək, insanlar arasında düşmənçilik və nifrət toxumları səpməyə, hətta silahlı münaqişələr yaratmağa çalışırlar”. Moskva və Ümumrusiya Patriarxı yeni qurumun yaranmasında aktiv iştirakına görə Şeyxülislam Hacı Allahşükür Paşazadəyə təşəkkürünü bildirib.

Şeyxülislam Allahşükür Paşazadə isə çıxışında bu görüşü beynəlxalq dinlərarası münasibətlərdə yeni mərhələ adlandırıb: “Bu mərhələ ilahi məqsədlərin təsdiqi üçün dini icmaların UNESCO ilə birbaşa dialoqunun nümayişidir. Əminəm ki, yeni yaradılan qurum bütün dünyada dinlərarası münasibətlərin inkişafına yeni impuls verəcək”. A. Paşazadə Qafqaz Müsəlmanları İdarəsinin sədri, MDB müsəlmanlarının Dinlərarası Şurasının həmsədri və MDB müsəlmanlarının yeni yaradılan Məşvərətçi Şurasının başçısı kimi yeni yaradılan qrupun fəaliyyətinin güclənməsi üçün əlindən gələni əsirgəməyəcəyini bildirib.

Sonda təsis yığıncağında Kommünike qəbul edilib. Toplantı iştirakçılarını Rusiya Federasiyasının prezidenti Dmitri Medvedev qəbul edib.