Din

Ana səhifə

Din

Qafqaz Müsəlmanları İdarəsi: Qrip əleyhinə vaksin vurdurmayan zəvvarlara Həcc ziyarətinə getmək üçün viza verilməyəcək

30 iyul 2009 09:03 (UTC +04:00)

Bakı. Elbrus Seyfullayev-APA. “Həcc ziyarətinin bu il üçün ləğvi haqda nə Səudiyyə Ərəbistanı Krallığının, nə də ki Azərbaycan hökumətinin rəsmi qərarı yoxdur. Bizim üçün əsas onların qərarı olacaq”. Bu barədə APA-ya açıqlamasında Qafqaz Müsəlmanları İdarəsinin mətbuat xidmətinin rəhbəri Rəhimə Dadaşova bildirib.

Mətbuat xidmətinin rəhbəri deyib ki, dünyanın bir çox ölkələrində, o cümlədən Səudiyyə Ərəbistanında A/H1N1 (“donuz qripi”) virusunun yayılması ilə bağlı Həcc ziyarətinin təxirə salınması haqda onlara hələlik hər hansı rəsmi müraciət daxil olmayıb. R. Dadaşovanın sözlərinə görə, ümumən Həcc missiyasını həyata keçirən ölkə tərəfindən belə bir qərar çıxarılsa, bu, bütün müsəlmanlara şamil olunacaq: “Hələlik ziyarətə hazırlıq işləri öz qaydasında gedir. Bütün zəvvarların qrip əleyhinə vaksin vurdurmaları haqda arayışı olmalıdır. Əks halda tələb olunan arayışı təqdim etməyən zəvvarlara Səudiyyə Ərəbistanı Krallığının Azərbaycandakı səfirliyi tərəfindən viza verilməyəcək. Əgər ziyarət vaxtına qədər A/H1N1 virusu əleyhinə vaksinlər hazırlanacaqsa, zəvvarlara onlar da vurulacaq” .

Qeyd edək ki, bu il Qafqaz Müsəlmanları İdarəsi Həcc ziyarəti üçün ayrılan kvotanı 6 mindən 2 min nəfərə qədər azaldıb. Bu il Həcc ziyarəti noyabrın əvvəllərində başlayacaq. Artıq avtobusla Həccə getmək istəyənlər üçün ayrılan 300 nəfərlik yerə sənəd qəbulu başa çatıb. Təyyarə ilə ziyarətə getmək istəyənlərin isə sənədlərinin qəbulu davam etdirilir.

Xatırladaq ki, bu il Həcc ziyarətinin qiymətində dəyişiklik baş verməyib. Belə ki, bu il Həccə getmək istəyənlər ötən il olduğu qədər - avtobusla 2 min manat, təyyarə ilə isə adambaşına yerləşmədən asılı olaraq, 3500-5000 manat ödəməli olacaqlar.