Din

Ana səhifə

Din

Şeyxülislam: “Rəy almaq üçün QMİ-yə müraciət edən dini icmalardan birinin fəaliyyəti mübahisəlidir”

15 sentyabr 2009 12:30 (UTC +04:00)

Bakı. Elbrus Seyfullayev - APA. “İndiyə kimi 200-ə qədər müsəlman təmayüllü dini icma təkrar dövlət qeydiyyatından keçmək üçün rəy almaq məqsədilə bizə müraciət edib. Onlardan yalnız birinin fəaliyyəti mübahisəlidir. İndi biz bu məsələni araşdırmaqla məşğuluq”. APA-nın məlumatına görə, bu barədə Qafqaz Müsəlmanları İdarəsinin (QMİ) sədri, Şeyxülislam Hacı Allahşükür Paşazadə keçirdiyi mətbuat konfransında bildirib. Şeyx rəhbərlik etdiyi quruma müraciət edən icmalara rəy verəcəklərini deyib. Onun sözlərinə görə, QMİ ancaq məsələnin dini tərəfini araşdırır və buna cavabdehdir.

Ölkədə qanunsuz inşa edilən məscidlərin sökülməsi ilə bağlı məsələyə toxunan A. Paşazadə qanunda nəzərdə tutulan səlahiyyətindən kənara çıxaraq, belə məsələlərə müdaxilə edə bilmədiyini söyləyib: “Nə məscidin sökülməsi, nə də tikilməsi bizlik deyil. Biz sadəcə rəy veririk. Bu məsələdə bizim məsuliyyətimizi dövlətlə eyni sıraya qoymaq düzgün deyil. Təbii ki, mən məscid sökülməsinin əleyhinəyəm. Bu yaxınlarda “Fatimeyi-Zəhra” məscidinin rəhbərliyi mənə müraciət etdi. Onların sivil şəkildə apardıqları mübarizədən xoşum gəldi. Mən də öz növbəmdə dövlətə müraciət edib, məsələnin həllini xahiş etmişəm. Heç bir dövlət istəməz ki, onun daxilində iğtişaş baş versin. Ancaq ortada bir məmur acgözlüyü var. Əgər fəaliyyət göstərməyə icazə verilməyəcəkdisə, onda bu məscidin tikintisinə niyə göz yumurdular? Onlar hara baxırdılar? Bəzi İcra Hakimiyyətlərinin binasından baxanda tikilən məscidləri gözlə belə görmək mümkündür”.

QMİ sədri insanların şəriət qaydalarının pozmasından, onların israfçılıq etməsindən də gileylənib: “Bəzən görürsən biri öləndə olduqca böyük ərazini zəbt edib ona həddən artıq uca başdaşı qoyurlar. Buna daha çox məmurlar aludə olurlar. Sağ vaxtı əzizinə qiymət verməyənlər, öləndən sonra ona abidə qoyurlar. Bütün bunlar yaramaz işlərdir. Biz sivil olmalıyıq. Böyük qəbirlər şəriətə uyğun deyil”.

Mətbuat konfransında A. Paşazadə 30 ildir ki, qədim kitabları toplamaqla məşğul olduğunu da açıqlayıb: “Bəziləri silah yığır, mən də kitab yığıram. Əlimdə hətta XVI əsrə aid kitablar və əlyazmalar var. Bunlar çox qiymətli kitablardır. Bunları bir kitabxana formasına salmaq istəyirəm ki, istəyənlər gəlib oxuya bilsinlər ”.

Şeyxülislam