Din

Ana səhifə

Din

Azərbaycanda daha bir məscid bağlanıb - YENİLƏNİB

Azərbaycanda daha bir məscid bağlanıb - <font color=red>YENİLƏNİB</font>

16 sentyabr 2009 11:04 (UTC +04:00)

Bu barədə APA-ya məsciddə ibadət edən Gəncə sakinləri məlumat veriblər. Onlar bir qrup şəxsin məscidə gələrək, ibadət ocağının qapısına möhür vurduğunu və heç kəsi namaza buraxmadığını bildiriblər. Sakinlər deyib ki, məscidin qapısına möhür vuranlar məsələ ilə bağlı Dini Qurumlarla İş üzrə Dövlət Komitəsinə müraciət etməyi məsləhət görüblər.

Qeyd edək ki, bu ibadət ocağı Gəncədə Alban kilsəsi kimi tanınır. Sonradan məscid kimi fəaliyyət göstərən ibadət ocağında həm sünni, həm də şiə məzhəbinə mənsub şəxslər namaz qılırlar. Son vaxtlar isə məsciddə daha çox vəhhabilərin kütləvi şəkildə ibadət etdiyi söylənilir.

Məsələ ilə bağlı hələlik Dini Qurumlarla İş üzrə Dövlət Komitəsindən münasibət öyrənmək mümkün olmayıb.

Bağlanan məscidin imamı İlham İbrahimov APA-ya açıqlamasında məscidin qapılarının bir-iki saat əvvəl möhürləndiyini deyib. Onun sözlərinə görə, bu gün Dini Qurumlarla İş üzrə Dövlət Komitəsinin Gəncə şəhər nümayəndəliyinin rəhbəri Firdovsi Kərimov, Gəncənin Nizami rayonunun Polis Şöbəsinin əməkdaşları və Mədəniyyət və Turizm Nazirliyinin nümayəndələri ibadət ocağına gələrək məscidin qapısına möhür vurublar: “Onlar dedilər ki, məsciddə fəaliyyət göstərən dini icma dövlət qeydiyyatından keçməlidir. Biz isə qeydiyyat üçün müraciət hazırlamışıq. Bizim icmanın adı “Gəncə şəhər Cümə məscidi” Dini İcmasıdır. Məscid isə “Gəncə Şahsevənlər Cümə məscidi” adlanır. Burada, əsasən, sünnilər ibadət edir. Biz onlardan bir neçə gün, yəni Ramazan bayramına qədər vaxt istədik, vermədilər. İndi küçədə namaz qılmaq istəyirik”.

Qeyd edək ki, bir müddət əvvəl paytaxt Bakıda fəaliyyət göstərən “Məhəmməd Peyğəmbərin məscidi” və “Neft Daşları”ndakı məscid sökülüb, məhkəmə Yeni Günəşli qəsəbəsindəki “Fatimeyi-Zəhra” məscidinin sökülməsinə qərar verib, “Şəhidlər” məscidi isə bağlanıb.