Din

Ana səhifə

Din

Azərbaycanda müsəlmanların Ramazan və yəhudilərin Roşha-Şana bayramları birgə qeyd edilir - REPORTAJ

Azərbaycanda müsəlmanların Ramazan və yəhudilərin Roşha-Şana bayramları birgə qeyd edilir - <font color=red>REPORTAJ</font>

19 sentyabr 2009 11:02 (UTC +04:00)

Quba. Könül Abdullayeva – APA. Azərbaycan yəhudiləri yeni ilin gəlişini - Roşha-Şana bayramını qeyd edir. APA-nın şimal bürosunun xəbərinə görə, bu gün yəhudi təqvimi ilə 5770-ci ilin ilk günüdür.

Yəhudi dilində Roşha-Şana, yəni yeni il adlanan bu bayramı Qubanın Qırmızı Qəsəbə massivində yaşayan dağ yəhudiləri də ənənəyə uyğun şəkildə qarşılayır. Dağ yəhudiləri bayramın ilk günündə sinaqoqa gedir, mənəvi saflıq qazanmaq üçün və yeni ilin uğurlu olması arzusu ilə səhər və axşam saatlarında bayram ibadəti edir.

Qırmızı Qəsəbə dağ yəhudiləri dini icmasının sədri Boris Simanduyevin dediyinə görə, Roşha-Şana insanları günah əməllərdən çəkinməyə, Tanrıya ibarət etməklə mənəvi sağlığa qovuşmağa çağıran bir mərasimdir: “Bu mərasim yeni ilin ilk 10 günü ərzində keçirilir. Bu günlər ərzində Allah insanlara imkan verir ki, onlar etdikləri hərəkətləri düşünsün, pis əməllərdən həmişəlik əl çəksin”.

Qırmızı Qəsəbədə yeni ilin gəlişi ilə bağlı icra olunan dini ayinlər qoç buynuzundan hazırlanan şeypurun səsləndirilməsi ilə yekunlaşır. Günahlara həmişəlik tövbə etmək mənasını ifadə edən sonuncu ayin Yom-Küpür adlanır. Bayramın 10-cu günündə keçirilən bu ayin bir sutka ac qalmaqla icra olunur. Daha sonra bayram şənlikləri başlayır. Kişilərin adına qurban kəsilir, şirniyyat süfrələri açılır. El adətinə görə, almanı bala batırıb yeyirlər ki, il şirin təəssüratlarla keçsin. Həmçinin bu bayram ərəfəsində evlərdə təmizlik işləri görülür, hər yerdə səliqə-sahman yaradılır.

Yeni ilin Vətəndə qarşılamaq vacib sayılır. Odur ki, bu günlər xarici ölkələrdə olan qubalı dağ yəhudiləri Vətənə gəlir. Qubalı müsəlmanlar və dağ yəhudiləri uzun illər davam edən mehriban münasibətlərin təzahürü kimi hər iki xalqın müqəddəs bayramını - Ramazan və Roşha-Şana bayramlarını bir-birini qonaq çağırmaqla birlikdə qeyd edirlər.