Din

Ana səhifə

Din

Azərbaycan paytaxtında yeni pravoslav kilsəsinin inşa edilməsi ilə bağlı danışıqlar aparılır

09 oktyabr 2009 11:34 (UTC +04:00)

Bakı. Laçın Sultanova - APA. Bakı və Xəzəryanı Yeparxiyanın bərpa olunmasının 10 illiyi münasibətilə yepiskop Aleksandr Ata mətbuat konfransı keçirib. APA-nın məlumatına görə, yepiskop 1905-ci ildə yaradılmış Yeparxiyanın tarixi barədə məlumat verib.
O bildirib ki, Yeparxiya yaranan dövrdə Azərbaycanda 70-ə yaxın, Bakıda isə 17 pravoslav kilsə fəaliyyət göstərib. Lakin sovet dövrində kilsələr bağlanıb, çoxu dağıdılıb, yalnız 1944-cü ildə kilsələrin fəaliyyətə başlamasına icazə verilib. Yepiskop Bakı və Xəzəryanı Yeparxiyanın 1998-ci ildə bərpa olunduğunu, bunda Heydər Əliyevin böyük rolu olduğunu qeyd edib.
“Azərbaycan həmişə polikonfessional ölkə olub, burada heç vaxt dinlərarası münaqişələr baş verməyib” deyən dini xadim ötən əsrin 90-cı illərinin əvvəllərində ölkədə yaranmış çətin vəziyyət zamanı da heç bir müqəddəs məkanın təhqirə məruz qalmadığını xüsusi vurğulayıb.
Aleksandr Ata bildirib ki, rəhbərlik etdiyi Yeparxiyanın nəzdində (Azərbaycan və Dağıstanda) - 14 şəhər və 9 kənddə 22 prixod, 5 kiçik kilsə fəaliyyət göstərir, Kizlyarda qadın monastırı fəaliyyətini bərpa edib.
Jurnalistlərin suallarını cavablandıran Yepiskop kilsəyə mənsub şəxslərin sayının statistikasının aparılmadığını söyləyib: “Amma nəzərə alsaq ki, pravoslav kilsəyə ruslar, ukraynalılar, belaruslar, yunanlar və gürcülər aiddir, onların Azərbaycanda sayı 180 min nəfərdir”.
Hazırda Bakıda 3 pravoslav kilsəsinin fəaliyyət göstərdiyini deyən Aleksandr Ata yeni kilsə inşa etmək üçün Bakı rəhbərliyi ilə danışıqlar aparıldığını bildirib.
Azərbaycanda yeni qeyri-ənənəvi dinlərin fəaliyyəti ilə bağlı sualı cavablandıran Yepiskop deyib ki, bu məsələ həm xristianları həm müsəlmanları narahat edir: “Kilsə dinini dəyişən insanları qınayır”.