Din

Ana səhifə

Din

Şeyxülislam Allahşükür Paşazadə Qurban bayramı münasibətilə Azərbaycan xalqını təbrik edib

25 noyabr 2009 11:23 (UTC +04:00)

QMİ-dən APA-ya daxil olan təbrikdə deyilir: “İslam aləminin ən mübarək günü – müqəddəs Qurban bayramı münasibətilə bütün Azərbaycan dindarlarını səmimi qəlbdən təbrik edir, Allah-Taaladan xalqımıza və dövlətimizə rifah, əmin-amanlıq və səadət diləyirəm.

Dünya müsəlmanlarının Eydül - Əzha - Böyük bayram kimi qeyd etdiyi Qurban mərasimi qədim tarixi və ilahi məzmunu olan bir ənənədir. Hənif Peyğəmbərimiz Həzrəti İbrahim Əleyhissəlamın Allah-Taalaya olan sədaqəti müqabilində Rəbbimizin ali mükafatı böyük mənəvi və fəlsəfi dəyərə malikdir. Pərvərdigari-Aləm Həzrəti İsmayıl Əleyhissəlamın özünü deyil, ata sözünə vəfasını, valideyninə təmənnasız sevgisini, şərə-şeytana nifrətini peyğəmbər övladının yüksək məziyyəti kimi qəbul edir və həmin andan etibarən insan qurbanı adəti bəşərdən tamamən götürülür. Allaha əhdinə sadiq qalan hər bəndə nəticədə layiq olduğu mükafatı qazanır. Ona görə də hər birinizə həyatın bütün məqamlarında səbr, dəyanət və əzmlə yanaşı, Allah əhdinə sədaqətli olmağı, valideyninə ehtiramla yanaşmağı, verdiyi sözü uca tutmağı, ümumi mənafeni şəxsi istəklərindən üstün bilməyi tövsiyə edirəm”.

Qurban bayramının təqvimimizin mübarək tarixlərindən biri olduğunu qeyd edən A. Paşazadə bayramlarımızın mahiyyətinin ictimai bərabərlik, yardımlaşma və mərhəmət ruhundan ibarət olduğunu, əsas qayəsini isə ailədə barış, cəmiyyətdə sülhün bərqərar olması təşkil etdiyini vurğulayıb. Şeyxülislam Qurban süfrəsində kimsəsizlərə, yetimlərə, qocalara, imkansızlara yardım ediləcəyini, xeyriyyə tədbirlərində bayramın əzəli dualarının səslənəcəyini bildirib: “Məkkədə, Mina dağında Həcc əməllərini tamamlayıb, bayram qurbanlarını kəsdirən azərbaycanlı hacılarımız da dövlətimizin qüdrəti, xalqımızın xoşbəxtliyi və Qarabağ zəfəri üçün bizimlə bərabər dualar edəcəklər. Biz də torpaqlarımız və müstəqilliyimiz uğrunda şəhid olanların ruhuna rəhmət diləyir, Allah dərgahında qurbanlarımızın qəbul, niyyətlərimizin müstəcəb olması üçün xeyir-dualar edir, bütün Azərbaycan xalqını əziz bayram münasibətilə bir daha ürəkdən təbrik edirik.
Allah köməyimiz olsun!”

Qurban_bayram