Din

Ana səhifə

Din

Azərbaycanda fəaliyyət göstərən dini konfessiyaların rəhbərləri İsveçrədə minarələrin inşasına qoyulan qadağanı pisləyirlər - SORĞU

Azərbaycanda fəaliyyət göstərən dini konfessiyaların rəhbərləri İsveçrədə minarələrin inşasına qoyulan qadağanı pisləyirlər - <font color=red>SORĞU</font>

03 dekabr 2009 12:03 (UTC +04:00)

Bakı və Xəzəryanı Yeparxiyanın mətbuat katibi Konstantin Ata APA-ya bildirib ki, demokratiya haqqında hamıdan çox danışan və onu başqalarına zorla qəbul etdirmək istəyənlərin özlərində demokratiya olmur: “ Buna Birləşmiş Ştatları misal göstərmək olar. Bu ölkədə bir çox dini sektaları fəaliyyətinə geniş şərait yaradılıb, bir çox sektaların fəaliyyəti isə qadağan edilib. Yaxud götürək rezervasiyada yaşayan hinduları. Həmin vəziyyət Avropada da mövcuddur, onlar demokratiya barəsində çığırırlar, amma oradakı cəmiyyətlər hamıdan az demokratikdir. Minarələri qadağa etmək ağıllarına gəlib, qadağanı ediblər. Əlbəttə, referendum keçirilib, amma yazıq müsəlmanlar azlıqda qalıblar. Biz bu qərarı pisləyirik, bu qərar mömin müsəlmanların və digər konfessiyalara məxsus insanların hüquqlarını pozur. Moskva Patriarxiyası artıq bu qərara münasibət bildirib. Avropanın ürəyi olan İsveçrədə insanlar öz dini ayinlərini həyata keçirə bilmirlər, bu möminlərin hüquqlarının pozulmasıdır”.

Konstantin Ata Azərbaycanda pravoslav kilsəsinin fəaliyyətinə heç bir məhdudiyyət qoyulmadığını deyib: “Biz öz dini mərasimlərimizi rahat şəkildə həyata keçiririk, azad şəkildə ibadətlərimizi edirik, məzarlarımızı ziyarət edirik. Əgər biz Bakının mərkəzində tədbir keçirmək istəyəndə - məsələn, iyunun 24-də Qız Qalasının yanında Apostol Varfolomeylə bağlı ibadət keçirirdik - bununla bağlı şəhər rəhbərliyi bizə hər zaman icazə verir. Bizim fəaliyyətimiz üçün heç bir maneə yoxdur, nə kilsələrdə zənglərin çalınmasına, nə ibadət, nə də ki xaç yürüşü keçirməyə heç bir məhdudiyyət yoxdur. Şəhərin mərkəzində ibadət və yaxud da xaç yürüşü keçirmək istəyəndə meriya digər sanksiyalı kütləvi tədbirlərə olduğu kimi icazə verir. Bizim bütün kilsələrimizdə səhər saat 9-da və axşam saat 17-də kilsə zəngləri çalınır, Pasxa və Milad bayramlarında isə kilsə zəngləri heç bir qadağa və məhdudiyyət qoyulmadan gecə də çalınır”.

Azərbaycanda yaşayan Avropa Yəhudiləri İcmasının rəhbəri Gennadi Zelmanoviç də məsələyə münasibət bildirib: “Deyirlər ki, Avropa ölkələri tolerant ölkələrdir, amma bu ölkələrdə məscidlərin, sinaqoqlarn və katolik kilsələrin inşasına məhdudiyyətlər qoyulur. Mənim üçün çox təəccüblüdür ki, İsveçrə və bu ölkənin vətəndaşları belə bir qərar verdilər. Mən buna mənfi münasibət bildirirəm”. İcma rəhbəri Azərbaycanda təmsil etdiyi icmanın fəaliyyəti üçün heç bir problem olmadığını deyib: “7 il əvvəl yeni sinaqoqainşa etmişik, onun fəaliyyətinə heç bir məhdudiyyət qoyulmayıb. Azərbaycan dünyanın tolerant ölkələrindən biridir, bir çox beynəlxalq konfranslarda bu ölkə digərləri üçün nümunə kimi göstərilir”.

Azərbaycanda yaşayan Dağ Yəhudiləri İcmasının rəhbəri Semyon İxiilov APA-ya açıqlamasında İsveçrədə çox az sayda müsəlman yaşadığını xatırladıb: “İsveçrə Avropa ölkəsidir, orada cəmisi 4 minarə varsa, deməli islam tərəfdarlarının sayı çox deyil. Həmin minarələri qorumaq lazımdır. Hansı dinə aid olmasından asılı olmayaraq, müqəddəs olan dini abidələri sındırmaq, məhv etmək olmaz. Bu kafirlikdir, Allah belə insanları cəzalandırır. Minarələr gözəllikdən başqa heç nə yaratmır”.

Semyon İxillov Azərbaycanın tolerant bir ölkə olduğunu vurğulayb: “Bu ölkədə hər bir şeyə böyük hörmətlə yanaşılır. Burada nə minarələr, nə azan, nə kilsələr, nə sinaqoqlar heç kimə maneçilik etmir. İstənilən ibadət aparılırsa, ona hörmət etmək lazımdır, çünki ibadət edən insanlarla böyük yaradan arasında ünsiyyət yaranır, ona görə də bu mənzərəyə hörmətlə, anlamla yanaşmalısan”. Semyon İxillov Dağ Yəhudiləri İcmasının Azərbaycanda çox sərbəst fəaliyyət göstərdiyini deyib: “Hətta ayda bir dəfə, yeni ay çıxanda biz ibadətimizi sinaqoqun həyətində keçiririk, yeni aya ibadət edirik. Bizim fəaliyyətimiz üçün heç bir məhdudiyyət yoxdur və heç vaxt olmayıb, biz heç kimə maneçilik etmirik. Bu ənənələr tarixidir və heç nə dəyişilə bilməz”.

Azərbaycanda fəaliyyət göstərən katolik kilsənin rəhbəri Vladimir Fekete isə İsveçrədə referendumlar tez-tez keçirildiyini deyib: “İldə 4-5 dəfə bu ölkənin rəhbərliyi əhalidən müəyyən məsələlərə münasibət öyrənir. Minarələrlə bağlı referenduma Müqəddəs Taxt Tac münasibət bildirərək öz təəccübünü bildirib və bunu dini azadlığın məhdudiyyəti kimi dəyərləndirib. Belə bir referendum nə dinlərarası, nə də dövlətlərarası münasibətlərin inkişafına xidmət etmir”.

Vladimir Fekete Bakıda bir aydan az bir müddətdə çalışdığını bildirib: “Bu müddətdə Qafqaz Müsəlmanları İdarəsinin sədri Şeyxülislam Hacı Allahşükür Paşazadə, Bakı və Xəzəryanı Yeparxiyanın yepiskopu Aleksandr Ata ilə görüşmüşəm. Bu görüşlərdən başa düşdüm ki, bu ölkədə dinlərarası münasibətlər çox yüksək səviyyədədir. Bu müddətdə katoliklərə aid olan heç bir problem barədə eşitməmişəm. Bakıda yeni katolik kilsə inşa edilib, orada quraşdırılmış zənglər gündə bir dəfə, bazar günləri isə üç dəfə səsləndirilir”.