Din

Ana səhifə

Din

Tiflisdə “İslam və xristian dinlərinin terrorçuluğa münasibəti” mövzusunda beynəlxalq konfrans keçirilib - FOTOSESSİYA

Tiflisdə “İslam və xristian dinlərinin terrorçuluğa münasibəti” mövzusunda beynəlxalq konfrans keçirilib - <font color=red>FOTOSESSİYA</font>

26 yanvar 2010 12:29 (UTC +04:00)

Tiflis. Nizami Məmmədzadə-APA. Bu gün Tiflisdə fəaliyyət göstərən “Alul-beyt” mədəni maarif mərkəzində “İslam və xristian dinlərinin terrorçuluğa münasibəti” mövzusunda beynəlxalq konfrans keçirilib. APA-nın Gürcüstan bürosunun məlumatına görə, tədbir İran İslam Respublikasının Gürcüstandakı səfirliyinin və Gürcüstan Patriarxlığının dəstəyi ilə baş tutub. Beynəlxalq konfransda İran İslam Respublikasından və Gürcüstandan olan 40-dan çox dinşünas alim, ekspertlər və Gürcüstanda yaşayan müsəlman dini icmalarının azərbaycanlı nümayəndələri iştirak edib.
Konfrans iştirakçıları tədbirdən əvvəl bütün Gürcüstanın Patriarxı Katalikos II İlya ilə görüşüblər. Konfransı Gürcüstan Patriarxlığında Dini və Etnik məsələlər üzrə mərkəzin rəhbəri Leyla Çeçelava açıb. Tədbirdə İran İslam Respublikasının nümayəndə heyətinin üzvü Mehti Təsxiri, İranın Gürcüstandakı səfiri Müctəba Dəmirçi, İranın Din və Sivilizasiya Mərkəzin rəhbəri doktor Müzəffəri, müqəddəs Georgi kilsəsinin nümayəndəsi Bidzina Quniya, Acariyadan gəlmiş din xadimi Zurab Tsetsxladze və başqa dinşünas alimlər çıxış edərək mövzuya münasibətlərini bildiriblər.
Konfrans iştirakçıları qeyd ediblər ki, hələ də dünyanın ayrı-ayrı bölgələrində terror nəticəsində günahsız insanlar həlak olur, qadın və uşaqlar qurbana çevrilirlər. Son illər Qafqaz bölgəsində də belə hadisələr çoxalıb. Burada xüsusi ilə təhlükəli vəziyyət yaranıb və heç kim terrordan sığortalanmayıb.

İranın Gürcüstandakı səfiri Müctəba Dəmirçi APA-ya açıqlamasında bildirib ki, konfransın məqsədi, dinlərin sülhməramlı rolu və onun terrorla mübarizə yollarını axtarmaqdır: “Terrorun məqsədi bu gün bəşəriyyətə bəla və təhlükə gətirməkdir. Bütün dinlər, o cümlədən islam və xristian dinləri də bunu pisləyirlər. Terrorçuluqla mübarizədə dini xadimlərinin rolu böyükdür. Terrorçu din və milliyyət tanımır, onun məqsədi zərbə vurmaqdır. Belə konfranslar terrorçuluqla mübarizədə müsbət addımlardan biridir”.

Konfransın sonunda dünya dinlərinə müraciət qəbul olunub. Gürcüstan Patriarxlığının dini və etiqad məsələləri üzrə mərkəzin rəhbəri Leyla Çeçenava APA-ya bildirib ki, müraciətdə ekstremizmə, separatçılığa və terrorçuluğa qarşı mübarizə aparmaq üçün dünya dinləri ilə birlikdə bütün dinşünas alimlərin biliyindən istifadə etmək tövsiyə olunub.