Din

Ana səhifə

Din

QMİ: II Kareginin Bakıya gəlib-gəlməyəcəyi yaxın günlərdə bəlli olacaq

06 aprel 2010 14:03 (UTC +04:00)

Qafqaz Müsəlmanları İdarəsi (QMİ) mətbuat xidmətinin rəhbəri Rəhimə Dadaşova APA-ya açıqlamasında bildirib ki, MDB Dinlərarası Şurasının həmsədri kimi Moskva və Bütün Rusiyanın Patriarxı Kiril həm öz adından, həm də digər həmsədr Şeyxülislam Allahşükür Paşazadənin adından II Kareginə dəvəti çatdırıb: “Bununla bağlı danışıqları Moskva tərəfi apardığı üçün bizdə hələlik dəqiq məlumat yoxdur. Hər halda yaxın bir neçə gün ərzində bu dəqiq bilinəcək” .

R. Dadaşovanın sözlərinə görə, aprelin 26-27-də Bakıda keçiriləcək tədbirə hazırıq işləri başa çatmaq üzrədir: “Samitdə 40-dan çox ölkədən 300-dən artıq ali qonaq iştirak edəcək. Onların arasında dünyanın bütün dini mərkəzlərinin nümayəndələri, dünya dinlərinin liderləri, habelə beynəlxalq təşkilatların təmsilçiləri olacaq. Sammit “Qloballaşma, din, ənənəvi dəyərlər” mövzusuna həsr olunub” .

R. Dadaşova deyib ki, sammitin gedişində QMİ sədri, Şeyxülislam Allahşükür Paşazadənin təmsil olunduğu YUNESKO-nun baş direktorunun yanındakı yüksək səviyyəli Məşvərət qrupunun yeni rəhbərinin iştirakı ilə ilk toplantının da keçirilməsi nəzərdə tutulub: “Bütövlükdə bu sammit MDB Dinlərarası Şurası tərəfindən keçirilir. Şeyxülislam Allahşükür Paşazadə həmin şuranın həmsədridir. Bu tədbirin Bakıda keçirilməsi Azərbaycanın dünyada tolerantlığın ünvanı kimi qəbul olunmasından irəli gələn bir məsələdir. İlk dəfə Bakı dünyanın dini mənəvi nəbzinin vuracağı məkana çevriləcək” .

Qeyd edək ki, sammitin rəsmi hissəsi “Gülüstan” sarayında keçiriləcək.

Allahşükür_Paşazadə