Din

Ana səhifə

Din

Azərbaycanda Dünya Dini Liderlərinin Ümumdünya Sammiti keçirilir - YENİLƏNİB - FOTOSESSİYA

Azərbaycanda Dünya Dini Liderlərinin Ümumdünya Sammiti keçirilir - <font color=red>YENİLƏNİB - FOTOSESSİYA</font>

26 aprel 2010 07:31 (UTC +04:00)

Bakı. Elbrus Seyfullayev - APA. Bu gün Azərbaycanda Dünya Dini Liderlərinin Ümumdünya Sammiti başlayıb. APA-nın əməkdaşı sammitdən xəbər verir ki, Gülüstan sarayında təşkil edilən tədbirin açılışında Azərbaycan prezidenti İlham Əliyev də iştirak edib. Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadə açılış nitqi ilə çıxış edərək, bu sammitin Bakıda keçirilməsinin mühüm amil olduğunu, Azərbaycanın dünyadakı nüfuzundan xəbər verdiyini deyib.

Tədbirdə çıxış edən Azərbaycan prezidenti İlham Əliyev də sammiti böyük əhəmiyyətə mailik hadisə adlandırıb: “Bakıda dünya dini liderlərinin görüşlərinin keçirilməsi artıq ənənəvi xarakter alıb. Azərbaycanda müxtəlif millətlərin, dinlərin nümayəndələri əsrlər boyu qardaşlıq şəraitində yaşayıblar. Bu gün bütün dinlərin rəhbərlərinin Azərbaycana gəlməsi mühüm hadisədir. Bu görüşlərin gözəl nəticələri olacaq. Bakının bir növ dinlərarası dialoqun mərkəzinə çevrilməsinə böyük əhəmiyyət veririk. Azərbaycan dinlərarası dialoqun inkişafına öz töhfəsini verir. 20 ilə yaxındır ki, Azərbaycan İslam Konfransı Təşkilatının, 10 ilə yaxındır, Avropa Şurasının üzvüdür. Bakı ötən il İslam mədəniyyətinin paytaxtı seçilmişdi. Gün gələcək ki, Bakı Avropa mədəniyyətinin də paytaxtı seçiləcək. Əsrlər boyu bütün dinlərin və millətlərin nümayəndələri Azərbaycanda birgə yaşayıblar. Ölkədə bütün azadlıqlar olduğu kimi, dini azadlıqlar da təmin olunub. Azərbaycanda 1000-dən artıq məscid, 11 kilsə, 6 sinaqoq fəaliyyət göstərir”.

Azərbaycan dövlət başçısı ölkənin qüdrətinin təkcə iqtisadi güclə ölçülmədiyini diqqətə çatdırıb: “Biz istəyirik ki, bölgədə sülh əldə edilsin, heç bir qarşıdurma olmasın. Əminəm ki, dünya dini liderlərinin birgə fəaliyyəti, bu sammitdə qəbul olunacaq sənədlər sülhə, əmin-amanlığa töhfə verəcək. Cəmiyyətdə böyük hörmətə malik olan dini liderlərin sözünə hər zaman böyük ehtiyac olub. Bugünkü tədbirdə səmimi fikir mübadiləsi üçün şərait var. Azərbaycan dünyəvi dövlətdir. Qloballaşma adı altında biz öz milli dəyərlərimizi unutmamalıyıq. Biz qloballaşma dedikdə dünyəvi dostluğu, əməkdaşlığı nəzərdə tuturuq. Qloballaşmaya dair bəzi dairələrdə olan şübhələri götürülməsinə çalışmalıyıq. Biz öz milli və dini dəyərlərimizə sadiqik, gənc nəsli vətənpərvərlik ruhunda tərbiyə etməliyik və edirik. Biz eyni zamanda müasirləşmə yolunda böyük addımlar atırıq. Əminəm ki, bu sammit bəzi problemlərin müzakirəsinə və aradan qaldırılmasına yardım edəcək”.

Sonra Rusiyanın Azərbaycandakı səfiri Vladimir Doroxin Dmitri Medvedyevin sammit iştirakçılarına təbrik məktubunu oxuyub.

Bunun ardınca QMİ-nin sədri A. Paşazadə çıxış edib. Şeyx deyib ki, tədbirdə, əsasən qloballaşma və din mövzusu müzakirə olunacaq, dini liderlər qloballaşan dünyada dini dəyərlər və dini münasibətlər mövzusu ətrafında fikir mübadiləsi aparacaqlar.

Dağlıq Qarabağ münaqişəsinə toxunan A. Paşazadə sammit iştirakçılarının bu problemdən xəbərdar olduqlarını vurğulayıb: “Biz Ermənistanla münaqişəni aradan qaldırmaq üçün səylər göstəririk. Dəfələrlə ermənilərin katolikosu ilə görüşlərimiz olub. Mən ermənilərin katolikosunun dəvətimizi qəbul edib sammitdə iştirak etməsini mühüm amil kimi qiymətləndirirəm. Biz sülhün tərəfdarıyıq. Əminəm ki, Bakı sammiti bu işə böyük töhfələr verəcək”.

Sonra Moskva və bütün Rusiyanın patriarxı Kirill çıxış edib. O, sammitdə bu gün bəşəriyyətin üzləşdiyi problemlərlə bağlı diskussiyaların aparılacağını deyib: “Bugünkü tədbirin mühüm əhəmiyyəti var. Dinin cəmiyyətdə rolu böyükdür”.

Dini icmaların cəmiyyətdə sərbəst və azad fəaliyyətinin vacibliyini vurğulayan Kirill terrorçuluğun aradan qaldırılmasının yalnız maarifləndirmə və dinlərarası dialoqla mümkünlüyünü qeyd edib: “Biz çalışmalıyıq ki, dünya dinləri arasında əlaqələr güclü olsun”.

Sammit işini davam etdirir.

Qeyd edək ki, tədbirdə 33 ölkədən 220 nümayəndə, o cümlədən bütün ermənilərin katolikosu II Qaregin də iştirak edir.

Sammit sabah başa çatacaq.

QMİ