Din

Ana səhifə

Din

Azərbaycanda Slavyan Yazısı Günü qeyd olunur

14 may 2010 13:41 (UTC +04:00)

Bakı. Laçın Sultanova - APA. Azərbaycanda ilk dəfədir ki, Slavyan Yazısı Günü qeyd olunur. APA-nın məlumatına görə, bununla bağlı Rusiya İnformasiya-Mədəniyyət Mərkəzində dəyirmi masa keçirilib.

Bakı və Xəzəryanı yepiskop Aleksandr Ata bildirib ki, mayın 24-ü müqəddəs Kirill və Mefodinin yaratdıqları Slavyan Yazısı Günü kimi qeyd olunur. O, mayın 15-də Bakı Slavyan Universitetində bu günlə bağlı elmi-praktik konfransın keçiriləcəyini, mayın 24-də isə Bakının bütün pravoslav kilsələrində təntənəli ibadətlərin keçiriləcəyini söyləyib.

Rusiyanın Azərbaycandakı səfiri Vladimir Doroxin bu günün Bolqarıstanda nümunəvi qeyd edildiyini vurğulayaraq bildirib ki, Rusiyada hər il bir şəhərdə əsas tədbirlər keçirilir: “Bu il tədbirlər Moskvada keçiriləcək. Yüksək səviyyədə mədəniyyətin və tolerantlığın olduğu Azərbaycanda bu günlə bağlı tədbirlər keçirməyə bütün imkanlar var”.

Bolqarıstanın Azərbaycandakı səfiri Vasil Kalinov isə 24 mayın Bolqarıstanda milli bayram kimi qeyd olunduğunu diqqətə çatdırıb: “Kirill və Mefodinin gördükləri iş Bolqarıstan tarixi və mədəniyyətinin ayrılmaz hissəsidir”.

Bakı katolik kilsəsinin rəhbəri Vladimir Fekete əslən Slovakiyadan olduğunu xatırladaraq deyib ki, onun ölkəsində bu müqəddəslərin adını daşıyan çoxlu kilsə var: “Kirill və Mefodiyə Avropanın himayədarları titulu verilib”.

Tədbirin sonunda Aleksandr Ata Slavyan Yazısı Gününə həsr olunmuş uşaq rəsmləri müsabiqəsinin qaliblərinə mükafatlar təqdim edib.